Tańǵy saǵat 6:00-de 5573 áskerı bólimindegi №226 daýys berý ýchaskesine alǵashqylardyń biri bolyp Ulttyq ulan Bas qolbasshysy, general-maıor Erkin Botaqanov kelip, konstıtýsııalyq referendýmge daýys berdi. Osylaısha Bas qolbasshy birinshi bolyp jeke quramdy oń ózgeristerge daýys berýge bastady.
«Ulttyq ulan áskeri elimizdiń tynyshtyǵy men turaqtylyǵyna jaýapty. Qandaı da bir jaǵdaı bolmasyn quqyqtyq tártip áskeriniń jaýyngerleri joǵary azamattyq jaýapkershilik pen bıik patrıottyq rýhty kórsete bilgen. Referendým arqyly biz elimizdiń oń ózgeristeri úshin daýys beremiz. Búgin ár áskerı qyzmetshi Joǵary Bas Qolbasshymyz Qasym-Jomart Toqaev usynǵan ózgeristerge belsendi qatysyp, qoldaý kórsetetinine kámil senemin», dedi general-maıor Erkin Botaqanov.
Ulttyq ulan Bas qolbasshysynyń tárbıe jáne áleýmettik-quqyqtyq jumystar boıynsha orynbasary, Halyq qaharmany, polkovnık Qaırat Úmbetovtiń aıtýynsha, áskerı bólimderde ashylǵan referendým ýchaskelerinde daýys berýshilerdiń belsendiligi óte joǵary bolǵan. Áskerı qyzmetkerlerdiń jeke quramy ǵana emes, olardyń otbasy da saıası naýqanǵa túgel qatysqan.
Daýys berý zań boıynsha tańǵy saǵat 6:00-de bastaldy. Referendýmǵa qatysýshylardyń basym bóligi – 18-ge endi tolǵan, tuńǵysh ret daýys berý quqyǵyna ıe bolǵan jas sarbazdar.
Elorda quramasy 5573 áskerı bóliminde Otan aldyndaǵy boryshyn atqaryp jatqan qatardaǵy jaýynger Raıymbek Bekejanov ta osyndaı tuńǵysh daýys berýshilerdiń biri. «Men táýelsiz Qazaqstannyń azamaty retinde elimizde oń ózgeristerdiń bolǵanyn qalaımyn. Sol úshin búgin azamattyq paryzymdy atqaryp, daýysymdy berdim», deıdi jas sarbaz.
Taraz qalasynan shaqyrylǵan qatardaǵy Erasyl Káriboz da alǵashqy ret daýys berýde. Áskerı kıim kıgeli ótken 7 aı ishinde qyzmetiniń qyr-syryn, qoǵamdyq tártiptiń mańyzyn, tatýlyq pen yntymaqtyń baǵa jetpes qundylyq ekenin uǵyp qalypty. «Otanymyzda beıbit ómir men kelisim ornap tur. Soǵan maqtanamyn!», deıdi ol.
«Uıymshyldyqpen ótken daýys berýdiń nátıjesin qorytyndylap ta úlgerdik. Bizge qarasty barlyq 37 jabyq referendým ýchaskesinde tirkelgender 100 paıyz daýys berdi. Zań buzýshylyqtar tirkelgen joq. Saǵat 12-de tolyǵymen tańdaýymyzdy jasap úlgerdik», deıdi polkovnık Qaırat Úmbetov.
Aıta keteıik, Ulttyq ulannyń áskerı bólimderde saılaý quqyǵy bar 13 myńǵa asa azamat qyzmet etedi.
