Búginde oblys ortalyǵynda 1 300-ge taıaý kópqabatty turǵyn úı bar. Osy aıdyń sońyna deıin kem degende myńǵa jýyq úı basqaratyn jańa birlestikter qurylýy kerek. Alaıda qazir Qostanaı qalasy boıynsha nebári 84 MIB, 17 jaı seriktestik qana jumys istep jatyr.
– MIB-ke ótýdiń baıaý júrýiniń sebebi burynǵy páter ıeleri kooperatıvteriniń ókilderi tarapynan teris nasıhat júrip jatyr. Olar «bizden ketseńder erteń páterlerińde qubyr jarylyp, sý aǵyp jatsa ony jóndeıtin maman tappaı qalasyńdar nemese 2-3 ese qymbat baǵaǵa jóndetetin bolasyńdar» dep qorqytyp, kedergi keltirip otyr. Mine, Úkimet belgilegen merzimniń aıaqtalýyna bir aq aı qaldy. Jurt endi ǵana qımyldaı bastady. Álbette, biz kómektesemiz. Burynǵy júıeniń ókilderi MIB qurýdy bir jylǵa keıin shegeredi degen jalǵan aqparat taratyp júr eken. Munyń bári bos sóz. Osy sońǵy aıdyń ishinde olar tolyq joıylyp, ornyna MIB kelýi kerek. Olaı bolmaǵan jaǵdaıda olardy zań kúshimen májbúrli túrde joıýǵa týra keledi. Taıaýda ákimdikte ótken jıynǵa páter ıeleri kooperatıvteriniń tóraǵalaryn shaqyryp, bir aıdyń ishinde úı basqarýdyń jańa túrine kóshý mindet ekenin taǵy túsindirdik. Olar ýáde berdi. Qazir Qostanaıdaǵy turǵyn úılerde jappaı jıyndar ótip jatyr. Biz bárin baqylaýda ustap otyrmyz, – dedi qalalyq turmystyq-kommýnaldyq sharýashylyq bóliminiń mamany Saılaý Asylbaev.
Gagarın kóshesindegi 144 páterli 14-shi turǵyn úı byltyr páter ıeleriniń kooperatıvinen ketip, qyrkúıek aıynda óz aldyna derbes menshik ıeleriniń birlestigin qurǵan. Byltyrǵa deıin «páter meniki, al kireberis pen aýlada, shatyr men syrttaǵy qoqysta sharýam joq» degen ustanymmen ómir súrip kelgen bul úıdiń turǵyndary endi kireberis dáliz de, shatyr da, jertóle de, tipti aýla men qoqys alańy da ózderiniń ortaq menshigi ekenin túsine bastaǵan.
Bul úıde búginde bir tóraǵa, úsh úı keńesi, bir revızııalyq komıssııa bar. Birlestik jumys isteı bastaǵan 8 aıdyń ishinde turǵyndardan túsken ortaq aqshaǵa birsypyra jumys atqaryldy. MIB tóraıymy jarnany kótergen joq. Turǵyndar, sol burynǵydaı, ár páterdiń bir sharshy metri úshin 47 teńgeden tóleıdi. Úıdiń kútimine osy qarjy da jetedi. 144 páterden jınalǵan aqshanyń 30 paıyzy MIB ákimshiligi men keńse taýarlaryna ketedi, qalǵany úı sharýashylyǵyna jumsalady. 144-shi úıdiń MIB-i búginge deıin jertóledegi búkil qubyr jelisin jańalap, shatyrdyń sýaǵarlaryn tolyqtaı aýystyryp aldy. Aýladaǵy eski túngi jaryq kózderin alyp tastap, ornyna únemdi shamdar ornatty. Nátıjesinde, buǵan deıin elektr qýatyna shyǵyndap kelgen tólemniń 50 paıyzy únemdeldi. Qazir bul úıdiń birlestigi aýlany kógaldandyrý, esiktiń aldyn sýarý jelisin jasaý jumystaryn júrgizip jatyr.
– Qostanaıda «Qamqor» jáne «Nash dom» atty eki qaýymdastyq ashylǵan. Bular jańa ashylyp jatqan MIB-terge quqyqtyq qoldaý kórsetedi. Biz 2021 jyldyń 1 qazanynda quryldyq. Basynda alańdaýshylyq boldy. Qazir bári retteldi. Jumys júrip jatyr, qarjy jetkilikti. Biraq keıbir máselelerde burynǵy páter ıeleri kooperatıvi kedergi keltirip, kezinde ózderi turǵyndardan jınaǵan aqsha men qujattardy bermeı áýrege salyp jatyr. Úıdi áli de bolsa burynǵysha ózderi basqara bergisi keledi. Osyǵan qaramastan, MIB baǵdarlamasyn ilgerilete berý kerek. Buǵan qajet jaǵdaıdyń bári bar. Qazir turǵyn úıge qyzmet kórsetetin kompanııalar kóp. Men shtatta jalǵyz ózim jumys isteımin. Jumysshy alǵan joqpyn. Eger bir sharýany isteý kerek bolsa, qyzmet kórsetetin fırmalardan kásibı maman shaqyrtamyn. Ol mindetin atqaryp, jumysyn bitirgen soń, qolyna kelisimdi aqshasyn ustatamyn. Qazir «Kaspıı bankpen» jumys istep jatyrmyz, óte qolaıly. Kimniń aqsha tapsyrǵanyn kún saıyn kórip otyramyn, – deıdi «Gagarın-14» MIB-iniń tóraıymy Natalıa Medvedeva.
Onyń aıtýynsha, MIB-tiń eń basty artyqshylyǵy – turǵyndar óz úıin ózi basqaryp, ózderi jınaǵan ortaq aqshanyń qaıda jumsalyp jatqanyn baqylaýda ustap otyrady. Úıdiń tozyńqyrap turǵan jerin jóndeýdi de kóp bolyp keńesip sheshedi. Qysqasy, bir tıyn artyq aqsha syrap bolmaıdy.
Zań boıynsha páter ıeleri kooperatıvi óziniń ornyna qurylǵan jańa birlestikke búkil qujattardy ótkizip, sońǵy úsh jyldyń qarjysy qandaı maqsatqa jumsalǵany týraly esep berýi kerek. Bulaı bolmaǵan jaǵdaıda MIB zańdy tulǵa retinde sotqa shaǵymdanady. Sońǵy kezderi mundaı daýlar jıilep ketkenimen, sotta qaralyp jatqan istiń bári MIB-terdiń paıdasyna sheshilip jatyr.
Qostanaı oblysy
