«Jasyl el» jastar eńbek jasaqtary – ekologııalyq jobalar men memlekettik baǵdarlamalardy júzege asyrý arqyly jastardy maýsymdyq jumysqa ornalastyrý, qalalar men eldi mekenderdi abattandyrý, jastardy patrıottyqqa tárbıeleýmen aınalysatyn qozǵalys.
Is-shara aıasynda úsh kún boıy ekologııa jáne áleýmettik jobalaý salasyndaǵy jetekshi sarapshylardan netýorkıng, trenıngter jáne sheberlik saǵattar, taqyryptyq alańdar uıymdastyryldy. Atap aıtsaq, ekologııalyq jobalardy bızneske aınaldyrý týraly «Turaqty bıznes strategııasy» atty sheberlik sabaq; ártúrli suranystar boıynsha jobany qalaı durys jazý kerek, áleýmettik jobany qurý boıynsha qadamdyq nusqaýlar, granttyq konkýrstarǵa ótinimderdi daıyndaý kezindegi tıptik qateler talqylanǵan «Áleýmettik jobalaý» atty trenıngi ótti. Sonymen qatar qazirgi jastar arasynda trend bolyp jatqan mobılografııa kýrsy boıynsha «Mobılografııa negizderi» trenınginde qatysýshylar telefon kamerasy arqyly sýretke, vıdeoǵa túsirý sheberligin úırendi.
«Jasyl el» jastar eńbek jasaqtary respýblıkalyq shtaby jetekshisiniń orynbasary Álisher Qardashov 2021 jyldan bastap el boıynsha 30 myń jas maýsymdyq-ekologııalyq jumystarǵa tartylǵanyn aıtty. Osy jyly da 30 myń jasqa jumys berý josparlanyp otyr.
– Búgingi is-sharanyń negizgi maqsaty retinde jastardyń ekologııalyq saýatyn arttyrý kózdelip otyr. Ár oblystyń ózindik erekshelikteri bar. Mysaly, bir óńir ekologııalyq aksııalar jasasa, basqa bir oblys kóbirek tal egedi jáne onyń tıimdi jaqtaryn biledi. Elimizdiń barlyq oblysy arasynda ekologııalyq tájirıbe almasý úshin osy is-sharany uıymdastyrdyq. Jastardy jańa jumys maýsymyna daıyndap, erekshelikterdi aıtý, qabyldanyp jatqan jańa jobalar týraly aqparat berý óte mańyzdy, – dep túsindirdi Álisher Qardashov.
Atyraý oblysyndaǵy «Jasyl el» jastar eńbek jasaqtary shtabynyń menedjeri Bekarys Zakarııa ár óńirden kelgen menedjerlerdiń tájirıbelerimen jańa jobalardy iske asyryp jatqanyn aıtty.
– Bul is-sharanyń jastarǵa beretin múmkindigi óte kóp. Sebebi ózge óńirde sheshilmegen máselelerdiń sheshimi basqa bir aımaqtardan tabylyp jatty. Mysaly, Aqtóbeniń tájirıbesine súıenip qazirgi tańda Pavlodardaǵy ekologııalyq máselelerdiń sheshý jolyn júzege asyryp jatyrmyz. Endi, ózimizdiń óńirdegi tabıǵat máselelerin rettep, jańa jobalardy qolǵa alýdy oılastyryp otyrmyz, – dedi Bekarys Zakarııa.
«Jasyl el» jobasy boıynsha jastar tek jazǵy kanıkýlda ǵana emes, sabaq ýaqytynda da jumys isteı alady. Muny Pavlodar oblystyq shtabynyń menedjeri Aıbek Ǵazızdiń tájirıbesinen aıqyn kórýge bolady. Bir jyl buryn sarbaz bolyp jumysqa turǵan ol qazir oblystyq shtab menedjeri retinde eńbek etedi.
– Aldymen basqalar sııaqty, ıaǵnı bir aı eńbek etip, aqshamdy alyp ketemin, dep oıladym. Biraq jumys barysynda osy iske degen qyzyǵýshylyǵym oıanyp, jumysymdy ári qaraı jalǵastyrdym. Osy jyldyń jańa eńbek maýsymynda oblys shtabynyń menedjeri boldym. Táýligine 8 saǵat qyzmet etemin. Bıyl 11-synypty bitirdim. Tek kanıkýl kezinde ǵana emes, sabaq ýaqytynda da eńbektenip, sabaǵym men jumysty birge alyp júrdim. Tańerteń sabaqqa baryp, tústen keıin jumysqa úlgeretinmin. Keıde, onlaın qujattarmen áriptesterime kómek beremin. Bolashaqta jýrnalıst bolýdy armandaımyn, – deıdi Aıbek Ǵazız.
Arýjan NAǴAShBAI,
L.N.Gýmılev atyndaǵy EUÝ stýdenti
