Elektrondy qaldyqtar qalaı zalalsyzdandyrylady?

Elektrondy, sonyń ishinde uıaly telefondar sektoryndaǵy qaldyqtardy qaýipsiz túrde kádege jaratýǵa baılanys­ty máselelerdi sheshýge baǵyttalǵan el Úkimeti, BUUDB jáne «Samsýng elektronıks» kompanııasynyń «Elektrondy qaldyqtardy basqarý» jańa birlesken jobasy is júzine asyryla bastamaq. Bul jaıynda keshe Prezıdent janyndaǵy Ortalyq kommýnıkasııalar qyzmetindegi dástúrli brıfıngte aıtyldy. Basqosýdyń bul jolǵy qonaqtary Qorshaǵan orta jáne sý resýrstary mınıstri Nurlan Qapparov, Qazaqstandaǵy BUUDB-nyń turaqty ókili Stıven Týll men «Samsýng elektronıks» kompanııasynyń prezıdenti Syn Sık Choı boldy. «Jobanyń negizgi maqsaty elektrondy qaldyqtardy basqarý mehanızmderin qurý. Atap aıtqanda, uıaly telefondardy qaýipsiz tásildermen kádege jaratý máselelerin sheshý bolyp tabylady. Qaldyqtardy ekinshi aınalymǵa túsirý men kádege jaratý búkil álem úshin mańyzdy másele. Atalǵan joba sheńberinde elektrondy qaldyqtardy jınaý men kádege jaratý syzbasyn jasap, elektrondy tehnıkalardy satatyn jerlerde uıaly telefondardy jınaýǵa arnalǵan eko-qorapshalardy ornatý, sonymen qatar elektrondy qaldyqtardyń zııany men olardy kádege jaratý joldary týraly halyqty aqparattandyrý josparlanǵan», dedi Qorshaǵan orta jáne sý resýrstary mınıstri Nurlan Qapparov. Statıstıkalyq málimetterge súıensek, Qazaqstanǵa 2000-2010 jyldary 3 mıllıon kompıýter ákelinse, onyń jartysy elektrondy qaldyqqa aınalǵan. Eldegi kompıýterlerdiń ósýi 26 paıyzdy qurasa, al satylatyn uıaly telefondar sany 120-dan 140 myńǵa deıingi aralyqty qamtıtyn kórinedi. Sońǵy jıyrma jyl ishinde kompıýterler, uıaly telefondar, baspa platalary, monıtorlar, teledıdarlar, prınterler men alýan túrli ózge de elektronıkany qosa alǵanda «elektrondy qoqystyń» kólemi ondaǵan esege ósken. Elimizde jaramsyz tehnıka eldi mekender mańyndaǵy polıgondar men qoqys tastaıtyn jerlerge ornalastyrylady. Bul qaldyqtar quramyndaǵy aýyr metaldar men turaqty organıkalyq lastaǵyshtar qorshaǵan orta men adam densaýlyǵyna zııanyn tıgizedi. Máselen, mamandardyń aıtýynsha, arasyna qorǵasyn, synap, sýrma, kadmıı, alty valentti hromnyń qospasy syndy basqa da elementter enetin qaýipti zattar aǵza ishinde jınalyp qalýǵa qabiletti bolady. Sondyqtan olardyń azdaǵan mólsheri de qaýipti bolyp sanalady. Sonymen birge, jerasty sýlary, topyraq pen atmosferany lastaı otyryp, adamdar densaýlyǵyna aıtarlyqtaı zııanyn tıgizedi. Kún ótken saıyn kólemi artyp kele jatqan elektrondy qaldyqtardy qaýipsiz jolmen kádege jaratý máselelerin sheshý úshin Qorshaǵan orta jáne sý resýrstary mınıstrliginiń qoldaýyna súıenip, BUUDB elektrondy qaldyqtardy basqarý jónindegi jobaǵa muryndyq bolyp otyr. Qazirgi tańda elektronıkany satý boıynsha otandyq naryqtyń kóshbasshylarynyń biri bolyp sanalatyn «Samsýng elektronıks» jobaǵa qarjylyq qoldaý kórsetken. Jobanyń resmı túrde is júzine asyryla bastaýy BUUDB men «Samsýng elektronıks» arasyndaǵy ózara túsinistik jaıyndaǵy memorandýmǵa qol qoıý arqyly bekitile túspek. Bul qujat atalmysh brıfıngte taraptardyń qol qoıýlarymen jalǵasyn tapty. Ábdirahman QYDYRBEK, «Egemen Qazaqstan».