JEO qyzmetkerlerimen áńgimelesý barysynda Májilis Tóraǵasynyń orynbasary Danııa Espaeva jáne Ádilet mınıstri Erlan Sársembaev energetıkterdiń jumysy adamdardyń kúndelikti ómirine tikeleı áser etetinin atap ótti. Sebebi stansanyń turaqty qyzmeti úılerge jylý berilýin, mektepterdiń, aýrýhanalar men kásiporyndardyń qalypty jumys isteýin qamtamasyz etedi. Dál osyndaı strategııalyq nysandar arqyly azamattar memlekettik saıasattyń sapasyn jáne qoǵam aldyndaǵy jaýapkershilik deńgeıin sezinedi.
Danııa Espaeva qoldanystaǵy Konstıtýsııanyń 1995 jyly qabyldanǵanyn eske salyp, osy ýaqyt aralyǵynda eldiń qoǵamdyq ómirinde, ishki jáne syrtqy saıasatynda aýqymdy ózgerister oryn alǵanyn atap ótti.
«Memleket basshysy Parlamentti jáne Konstıtýsııany jańǵyrtý úshin reformalar qajet ekenin aıtty. Azamattardan 2,5 myńnan astam usynys kelip tústi. 20 qańtarda olardy qarastyrý jáne ózgerister engizý maqsatynda Konstıtýsııalyq komıssııa quryldy», dedi Májilis Tóraǵasynyń orynbasary.
Jıynda memlekettiń áleýmettik jaýapkershiligin jáne azamattardyń quqyǵyn qorǵaýdy bekitetin jańa Konstıtýsııa jobasynyń normalaryna erekshe nazar aýdaryldy. Danııa Espaevanyń aıtýynsha, bul qaǵıdattar ınfraqurylymdyq salanyń ornyqty damýyna uzaqmerzimdi quqyqtyq negiz qalyptastyryp, strategııalyq kásiporyndardyń turaqty, qaýipsiz ári boljamdy jumysyn qamtamasyz etedi.
Kezdesý barysynda Erlan Sársembaev qaýipsiz eńbek jaǵdaılaryn, laıyqty jalaqyny jáne qyzmetkerlerdi áleýmettik qorǵaý kepildikterin bekitetin normalarǵa jeke toqtaldy. Mınıstrdiń sózinshe, bul kepildikterdiń Ata Zań deńgeıinde bekitýilýi eńbek adamyn qorǵaýdy kúsheıtedi jáne memlekettik saıasatta adamnyń qundylyǵy men qadir-qasıetiniń basymdyǵyn kórsetedi.
«Konstıtýsııada alǵash ret memlekettiń jaýapkershiligi bekitildi: memlekettik organnyń nemese laýazymdy tulǵanyń kinásinen keltirilgen zalal úshin tutastaı memleket jaýap beredi. Bul degenimiz, adam júıeniń tutqyny bolmaýy kerek. Memleket azamatqa qyzmet etedi. Negizgi maqsat – memlekettik apparattyń jumysyn adamdardyń quqyqtary men múddelerin qorǵaýǵa basymdyq beretindeı qaıta qurý», dedi mınıstr.
Kezdesý qorytyndysynda qatysýshylar Konstıtýsııa jobasynyń negizgi baǵyttary men normalaryn talqylap, óz pikirlerin bildirdi.
