Ońtústik Koreıada paromda qaza bolǵandar sany 100-den asty

ASTANA. 22 sáýir.Ońtústik Koreıada «Sevol» paromynyń apatqa ushyraýy saldarynan qaza bolǵandar sany 104 adamǵa jetti. Bul týraly Lenta.ru habarlady. Oqıǵa ornynda júrgizilip jatqan izdeý-qutqarý jumystary barysynda taǵy 45 adamnyń denesi tabylǵan. Dúısenbi kúni apat ornyna qutqarýshylardyń arnaıy jasaǵy kelip jetti. Olar tún batqanda jáne sýdyń qatty aǵynynda da jumystaryn toqtatpaıdy eken. Sondaı-aq qutqarýshylar sýdyń úsh myń metrlik tereńdigine deıin súńgip bara alady. «Sevol» paromynyń apatqa ushyraýyna baılanysty tergeý amaldary barysynda 44 adamǵa turǵylyqty jerinen eshqaıda ketpeý talap etildi. Olardyń qatarynda parom ıesi de bar. Polısııa qyzmetkerleri qutqarylǵan keme jolaýshylarynyń áleýmettik jelilerge jazǵan málimdemelerine súıene otyryp, osyndaı sheshim qabyldaǵan. Tergeý amaldary barysynda jalpy jeti adam tutqyndaldy. Olardyń arasynda jolaýshylardy qutqarý úshin tıisti sharalar qabyldaýdyń ornyna, apatqa ushyraǵan kemeden alǵashqylardyń biri bolyp qashqan keme kapıtany Lı Chjýn Sok bar. Kinási dáleldengen jaǵdaıda ol ómir boıyna túrmege qamalýy múmkin. Esterińizge sala keteıik, «Sevol» paromy 16 sáýirde Ońtústik Koreıanyń ońtústik-batys jaǵalaýyndaǵy Pıonphýndo aralynan 20 shaqyrym jerde apatqa ushyrady. Inchhon portynan Chedjýdo aralyna qaraı baǵyt alǵan keme bortynda 475 adam bolǵan. Ázirge 198 adam iz-tússiz joǵalǵandar qatarynda qalyp otyr. Aıdar О́risbaev. Derekkóz: Lenta.ru. Foto: Reuters.com.