Strıtbol

Basketboldyń bul túri úmitkerlerge ne beredi?

Qazaqstandyqtardyń Olım­pıadalarda jarqyraı kózge tú­sýi­ne taǵy bir múmkindik týyp tur. Ol úshin búgingi tańda eli­mizde kóshe basketbolyn jú­ıeli túrde jańǵyrtý qajet. О́ıtkeni, sporttyń osynaý túri jasóspirimder arasynda ótetin Olımpııa oıyndaryna kirdi. Bıyl birinshi ret Qazaqstan strıtbolshylar quramasy 18-26 tamyz aralyǵynda Qy­taı­dyń Nankın qalasynda óte­tin jasóspirimderdiń jazǵy Olım­pııa oıyndaryna qatysatyn bolady. Endigi jerde elimizdiń ár qıyryndaǵy kásipqoı basketbolshylar men áýesqoılar qurǵan Qazaqstan strıtbol lıgasy (SLK) kóshe basketbolyn álemdik deńgeıge kóterýge kúsh salýda. Jáne bul osy ýaqytqa deıin júıeli túrde jasalǵan jumystardyń jalǵasy dep bilý kerek. Sonymen, eldegi strıtboldy ornynan qozǵap, Olımpııa oıyndary dárejesine deıin kóterý men qarjylandyrý úshin keshendi sharalar atqaryla bastady. Halyqaralyq strıtbol federasııasymen (FIBA 3x3) jasalynǵan jumystardyń alǵash­qy nátıjesi bar. Sonymen, alǵashqy FIBA 3x3 strıtboly erejelerine sáıkes tuńǵysh irikteý oıyndary Almatyda 19 sáýirde bastalyp ta ketti. Týrnırge 1996-1997 jyly týǵan, sport mektepterindegi, sport seksııalary men aýlalardaǵy áýesqoı basketbol oıyndaryna qatysyp júrgen 16 komanda qatysyp, birinshi oryndy – «T.I.M.A.», ekinshi oryndy – «Djazmender», úshinshi oryndy – «Pochtı za 2 metra» komandalary jeńip aldy. Mundaı týrnır endi mamyr aıynda Aqtaý qalasynda, maýsym aıynda Astanada ótedi. Qazaqstan strıtbol lıgasy aldaǵy ýaqytta aı saıyn, eń kemi bir qalada sportty súıetinderdiń jasyna, jynysyna, kásipqoılyǵy men boıyna, áleýmettik mártebesine  bólmeıtin sporttyń osynaý, eń demokratııalyq túri boıynsha týrnırler ótkizýdi kózdep otyr. Aınash ESALI, «Egemen Qazaqstan». ALMATY. –––––––––––––– Sýrette: Almatydaǵy irikteý týrnıri.