ALDAÝ ASQYNYP TUR

Keshe Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı “Bank Sentr kredıt” AQ qyzmeti boıynsha qarjy polısııasy men Qarjy baqylaý agenttiginiń birlesip júrgizip jatqan tekseris barysy aıaqtalý satysynda dep habarlady. Qazirgi ýaqytta Qarjy baqylaý agenttigi  atalǵan bank qyzmetinde banktik zańnamanyń  qandaı da bir buzylǵanyn anyqtaǵan joq.  Oǵan baılanysty Qarjy polısııasy organdary da tekseris nátıjeleri boıynsha prosessýaldyq sheshim qabyldaıtyn bolady.  Sonymen qatar resmı ókil elimizde sońǵy kezderi qasaqana aldaý nemese senimge qııanat jasaý arqyly bógdeniń múlkin urlaý, ıaǵnı alaıaqtyq jasaý derekteri jıi oryn alyp otyrǵanyn aıtyp ótti. Jalpy, elimizdiń zańy boı­yn­sha alaıaqtyq jolmen bógdeniń múl­kine sýyq qol júgirtkenderge aýyr jaza taǵaıyndalady. Ondaı jan­dar­dyń teris isi áshkerelenip jatsa on jylǵa bas bostandyǵynan aıy­ryl­ǵanymen qatar, bar múlki tár­ki­lenedi. Biraq soǵan qaramastan alaıaqtyq keń taraǵan jáne qoǵam­dyq qaýiptiligi joǵary qylmys bolyp otyrǵan kórinedi. Máselen, mundaı qylmys túrine jıi bara­tyn­dardyń kóptigi sondaı tek ústi­mizdegi jyldyń úsh aıynda ǵana alty júzge jýyq qylmystyq is qoz­ǵalǵan. 483 qylmystyq is jete tek­serilip, sot qaraýyna jiberildi. Osy alaıaqtardyń is-áreketterinen memleket pen jazyqsyz jandar 2 mlrd. teńgeden astam zalal shekken. Máselen, Alma­ty qalasynda rıel­tor­lyq fırmanyń dırektory men onyń orynbasary  jalǵan qujat­tar daıyndap, jyljymaıtyn múl­ikti satý arqyly 48 mln. teńgeni qaltaǵa basqan. Biraq jalǵandyq jarǵa jyǵady degendeı, alaıaqt­ar­dyń isi áshkerelenip, ózderi tıisinshe 8,6 jáne 7,6 jylǵa sottalyp, múlikteri tárkilendi. Alaıaqtardyń qarmaǵyna kóbine qarapaıym adamdar ilinip jatady. Olar bıliktiń atynan sóz aıtatyn jandarǵa kádimgideı senim artady. Al negizinde jurt ondaı jandardyń naǵyz qylmyskerler ekenin ajy­rata almaı qalady. Adal jan­dar­dyń osy sengishtik qasıetin jaqsy biletin Sabına ıpotekaǵa páterler rásimdep beremin degen qur sózimen ǵana Asta­na qalasynyń kóptegen turǵynynyń 35,5 mln. teńgesin qol­darynan sanap alyp, taıyp otyr­ǵan. Aıta berse qarjy polı­sııasy keltirgen mundaı mysaldar óte kóp. Olar turǵyn úı baǵdar­la­masy boıynsha beriletin páterlerdi jáne jer telimderin alaýǵa kómek kórsetemiz degen aldaýlar arqyly da talaı adamnyń qyrýar qarjy­syn ıelenip ketken. Sonymen qatar resmı ókil bas bostandyǵynan aıyrý orynda­ryn­da jazasyn ótep júrgen sottalǵan­dardyń uıaly baılanys múmkindigin paıdalaný arqyly qylmystyq áreketterin jalǵastyrý barysynda áshkerelengenin, quny óte arzan avtokólikterdi alyp kelemin degen alaıaqtardyń kóptegen azamattardy aldap ketkenin, nesıe alý maqsa­ty­men bank salasynda jalǵan qujat­tardy paıdalaný arqyly jasalǵan qylmystyq áreketterdiń anyqtal­ǵanyn jáne  áleýmettik tólem retinde bólingen bıýdjet qarajatyn urlaý faktileri tirkelgendigin habarlady. Aleksandr TASBOLATOV.