Máselen, byltyr Qostanaı oblysynda shaǵyn kásipkerlikti damytýǵa arnalǵan memlekettik granttarǵa 60 mln teńge bólinse, bıyl bul soma 80 mln teńgege jetken.
– Kásipkerlikti damytýdyń 2021-2025 jyldarǵa arnalǵan Ulttyq jobasy aıasynda bıyl memleket granttaryna úmitkerlerden 302 ótinim kelip tústi. Jańa kásip bastap jatqandar arasyndaǵy báseke joǵary bolǵandyqtan, konkýrstyq komıssııaǵa grant ıelerin anyqtaý ońaı bolǵan joq. Jobalardy konkýrsqa qatysqan bıznes josparlardyń júzege asý múmkindikteri, jańashyldyǵy men básekege qabilettiligi, qarjylyq ómirsheńdigi, úmitkerdiń kásipkerlik tájirıbesiniń deńgeıi, jańa jumys oryndaryn ashý múmkindigi sııaqty birneshe qaǵıdattar boıynsha tańdap aldyq, – dedi kásipkerlikti damytý basqarmasynyń bólim basshysy Jasulan Qalenov.
Konkýrs qortyndysynda komıssııa úzdik dep tanyǵan 18 joba 2 mln 350 myń teńgeden 5 mln teńgege deıin qarjy granttaryn aldy. Jeńimpaz jobalardyń beseýi Qostanaıda, úsheýi Arqalyqta, úsheýi Qostanaı aýdanynda júzege asyrylatyn bolady. Sonymen qatar Áýlıekól, Amangeldi, Jangeldın, Meńdiqara, Qamysty jáne Uzynkól aýdandary da bir-bir grantqa ıe boldy.
Konkýrsqa qatysqandardyń deni jastar men turmysy tómen otbasylardan ekenin aıta ketý kerek. Mysaly, bıylǵy grant ıeleriniń jeteýi – 29 jasqa deıingi jas kásipkerler. Úsheýi kópbalaly ana, al bireýi tolyq emes otbasydan shyqqan talapker. Grant jeńimpazdary ashatyn kásip te bıznestiń ár alýan salasyna jatady. Olardyń ishinde tamaq ónerkásibi, kıim, aıaqkıim tigý sehy, bilim berý qyzmeti, tipti balalar alańqaılary men sport keshenderin jasaıtyn óndiriske deıin bar.
Kásipkerlikti damytý basqarmasynyń ókilderi jobalardyń júzege asyrylý barysyna monıtorıng jasap otyratyndyqtaryn aıtty. Al bıyl bıznes-jospary maquldanbaı qalyp, memlekettiń qarjylaı qoldaýyna qol jetkize almaǵan kásipkerler jobalaryn tolyqtyryp, jetildirip, kelesi jolǵy konkýrsta taǵy bir ret baq synap kórmek.
Qostanaı oblysy
