Jańa ádisterdi Ál-Farabı atyndaǵy Qazaq ulttyq ýnıversıtetiniń Qan tamyrlary patologııasy ortalyǵynyń qyzmetkerleri ázirledi. Bul ádisterdiń jańashyldyǵy qurylǵylar men ádisterdiń arterııalyq tamyr ótkizgishtigin qalpyna keltire alatynynda bolyp otyr. Al mańyzdylyǵyna kelsek, tyń jańalyqty praktıkada qoldaný mıokard ınfarginen, ınsýlttan, trofıkalyq jaralardan, aıaq súıeginiń irińdeýi jáne basqa da múshelerden bolatyn mesheldik pen ólimdi azaıtady.
Ál-Farabı atyndaǵy QazUÝ Qan tamyrlary patologııasy ortalyǵynyń dırektory Oralbaı Dármenov ǵylymı ónertabystyń árqaısysyna eki patentten alynǵanyn aıtady.
«Arterııalyq tamyrlardyń ótkizgishtigin qalpyna keltirýge arnalǵan qurylǵylar men ádisterge Qazaqstan Respýblıkasynyń eki patentin jáne Eýrazııalyq patenttik vedomstvonyń eki patentin aldy. Bizdiń ónertabystarymyz «Arterııalyq tamyrlardyń ótkizgishtigin qalpyna keltirýge arnalǵan qurylǵy jáne ádis» jáne «Aterosklerotıkalyq blıashkalardy selektıvti ýltradybystyq dısseksııaǵa arnalǵan qurylǵy jáne arterııalyq tamyrlardyń ótkizgishtigin qalpyna keltirý ádisi» dep atalady. Emdeý ádisi mynadaı: biz arterııalarda jabyq qýys jasap, arterııa arqyly qan aǵyp jatqan kezde aterosklerotıkalyq blıashkalardy (blıasha degen qarapaıym tilmen aıtqanda túıin, búrtik, qan tamyrlarynda kezdesetin túıinshekterdi bildiredi – A.Sh.) preparatpen eritemiz. Bul ónertabystar aterosklerotıkalyq blıashkalardy túbegeıli joıýǵa jáne birden birneshe arterııany tazalaýǵa múmkindik beredi», dedi O.Dármenov.
Bul qurylǵylardy qoldaný qan tamyrlaryn stentteý, sondaı-aq ómirlik mańyzdy organdar, ıaǵnı júrek, mı, tómengi aıaq arterııalary jáne basqa da tamyrlaryna ashyq shýnttaý operasııalary sııaqty belgili jáne kúrdeli ádisterge qaraǵanda emdeýdiń salystyrmaly túrde tıimdi ári sapaly nátıjesin berýi múmkin.
«Jyl saıyn álemde stentter (operasııaǵa qajetti qurylǵy – A.Sh.) 60 mlrd dollarǵa satylady, biz usynatyn emdeý ádisi áldeqaıda arzan bolmaq. Bizdiń ónim tehnıkalyq ta, quny jaǵynan da osyǵan uqsas analogtardan birneshe ese asyp túsedi», dedi atalǵan ortalyqtyń basshysy.
Qazirgi ýaqytta ǵalymdar klınıkalyq synaqtar men kommersııalyq óndiriske arnalǵan qurylǵylardyń zerthanalyq jáne óndiristik úlgilerin jasaýmen aınalysyp jatyr.
