Ekologııa • 15 Maýsym, 2022

Qazaqstanda «О́simdikter dúnıesi týraly» zań jobasy maquldandy

39 ret kórsetildi

Májiliste «О́simdikter dúnıesi týraly» Qazaqstan Respýblıkasy zań jobasy maquldandy, dep habarlaıdy Egemen.kz.

Zań jobasyn QR Ekologııa, geologııa jáne tabıǵı resýrstar mınıstri Serikqalı Brekeshev tanystyrdy.

«Qurmetti depýtattar! Zań jobasyn qabyldaýdaǵy maqsat – respýblıkanyń búkil aýmaǵynda ósimdikter dúnıesin qorǵaý, molaıtý jáne utymdy paıdalaný salasyndaǵy qatynastardy quqyqtyq retteý. Qazirgi ýaqytta ósimdikter dúnıesin paıdalanýdy retteýge baılanysty jekelegen normalar QR Orman, Ekologııa, Jer, Sý, Kásipkerlik kodeksterin, «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly» jáne «Erekshe qorǵalatyn tabıǵı aýmaqtar týraly» QR Zańdaryn qamtıdy. Osyǵan baılanysty «О́simdikter dúnıesi týraly» arnaıy zańdy qabyldaý qajettigi bar, ol Qazaqstan ratıfıkasııalaǵan halyqaralyq konvensııalardyń erejelerine de negizdelgen», dedi mınıstr Májilistiń jalpy otyrysynda.

Onyń aıtýynsha, zań jobasyn ázirleý kezinde halyqaralyq tájirıbe eskerildi.

О́simdikter dúnıesi týraly ózge de uqsas zańdar Aýstralııada, Kanadada, Ońtústik Koreıada jáne Eýropalyq Odaq elderinde, Qazaqstan qabyldaǵan halyqaralyq konvensııalardyń, al jaqyn shet elderde – Armenııa, Belarýs, Qyrǵyzstan, Túrikmenstan, О́zbekstan jáne Ýkraınada bar.

Zań jobasyn retteý salasy tabıǵı jaǵdaılarda ósetin ósimdikter dúnıesi obektilerin, sondaı-aq genetıkalyq qordy saqtaý maqsatynda arnaıy jaǵdaılarda ustalatyn jabaıy ósimdikter men olardyń bólikterin qamtıdy.

«О́simdikter dúnıesi týraly» zań jobasynyń erejeleri aýyl sharýashylyǵy ósimdikterine, sondaı-aq úı mańyndaǵy, saıajaı jáne baý-baqsha ýchaskelerindegi ósimdikter dúnıesi obektilerine qoldanylmaıdy.

«Zań jobasynda ósimdikter dúnıesi obektilerin túgendeý, memlekettik monıtorıng jáne kadastr tártibi aıqyndalady. Bul respýblıkanyń búkil aýmaǵynda ósimdik resýrstarynyń esebin júrgizýge, olardyń sandyq jáne sapalyq sıpattamalarynyń ózgeristerine taldaý jasaýǵa, sondaı-aq ósimdikter dúnıesi obektilerin ekonomıkalyq baǵalaýǵa múmkindik beredi. Ǵylymı uıymdar bergen usynystar negizinde aýdandastyrylǵan aǵash túrleri, butalar, sondaı-aq shópti ósimdikter arqyly jasyl jelekterdi qurý tártibi belgilenedi», dep qosty mınıstr.

Sonymen birge, zań jobasynda ósimdikter dúnıesi obektilerin ıntrodýksııalaýǵa jáne býdandastyrýǵa qoıylatyn talaptar, tabıǵı ósimdikter qoǵamdastyǵyna qater tóndiretin ósimdikterdiń bóten tekti túrlerin engizýge tyıym salý belgilenedi.

Memlekettik organdar men qoǵamdyq uıymdar júrgizetin memlekettik jáne qoǵamdyq baqylaý ınstıtýttary engizilýde.

«Zań jobasynyń negizgi jańalyǵy – ósimdik áleminiń jekelegen túrleriniń aınalysy salasynda habarlama jasaý tártibin belgileý. Bul otandyq kásipkerlik sýbektileriniń farmasevtıkalyq, azyq-túlik jáne tehnıkalyq ónimderdi óndirý úshin ósimdik resýrstaryn zańdy negizde utymdy paıdalaný múmkindigine ıe bolatynyn bildiredi. Bul shara shaǵyn jáne orta bıznesti damytýǵa, osy salaǵa ınvestısııalar tartýǵa, sondaı-aq bıznes sýbektileriniń ósimdikter dúnıesin arnaıy paıdalanǵany úshin tólemaqy engizýi arqyly memlekettik bıýdjet kiristerin ulǵaıtýǵa múmkindik beredi. Sonymen birge jeke tulǵalar jabaıy jemisterdi, jańǵaqtardy, sańyraýqulaqtardy, jıdekterdi, dárilik shıkizatty jáne ózge de ósimdik resýrstaryn jeke jáne úıde paıdalaný úshin óteýsiz negizde jáne ruqsat berý qujatynsyz jınaıdy», dep túsindirdi Ekologııa mınıstri.

Jalpy alǵanda zań jobasy ósimdikter dúnıesi salasyndaǵy jalpy memlekettik mindetterdi sheshýdi kózdeıdi jáne «О́simdikter dúnıesi týraly» zańnyń normalaryn tolyq iske asyrý úshin Orman, Jer, Kásipkerlik, Salyq kodeksterine, «Ruqsattar jáne habarlamalar týraly», «Erekshe qorǵalatyn tabıǵı aýmaqtar týraly» jáne «Jaıylymdar týraly» zańdarǵa túzetý engizý talap etiledi.

Sońǵy jańalyqtar

Elorda «jasyl» aımaqqa ótti

Koronavırýs • Keshe

Uqsas jańalyqtar