Aqtaýdy kógaldandyrý jańa joba aıasynda júrgiziledi

Joba aıasynda Aqtaý qala­syn kógaldandyrý, aǵashtardy, butalardy, gúlderdi otyrǵyzý jáne jasyl jelekter men aǵash­tardy kútip-baptaý jumystary júrgiziledi.

– Bes jylǵa baǵyttalǵan joba aıasynda japyraqty aǵash­tar­dan 20 905 dana, qylqan japyraqty aǵashtardan 11 750 dana, sándik butalardan 1 460 dana, butalardan 20 myń sharshy metr, kógaldardan 5 myń sharshy metr, gúlzarlardan 652 500 dana, raýshan gúlderinen 18 myń dana egý josparlanǵan, – deıdi Aqtaý qalalyq turǵyn-úı kommýnaldyq sharýashylyǵy bólimi basshysynyń mindetin atqarýshy Anýar Týlıakov.

Memleket-jekemenshik árip­tes­tik aıasynda jumys isteıtin mekeme anyqtalǵanǵa deıin jyl basynan beri «Aqbota» MKK-nyń kógaldandyrýshylary jasyl jelekterdi kútip-ustaý, son­daı-aq jańa aǵash kóshetterin otyrǵyzý jumystaryn júrgizgen. Olar aqpan aıynan bastap 4 650 túp aǵash otyrǵyzdy. Onyń 2 650 danasy qylqan japyraqty (qaraǵaı, bıota) 2 myń danasy japyraqty aǵashtar (aılant, úıeńki, shaǵan, kılıterııa).

– Sonymen qatar qalanyń 9, 11, 14-shaǵyn aýdandaryn bi­rik­tiretin aınalma joldyń orta­syna 112 myń dana bir jyldyq shyraıgúl gúlderi, 12-shaǵyn aýdandaǵy T.Álnııazuly eskert­kishiniń aldyna raýshan gúl­deri egildi. Otyrǵyzylǵan kóshetterdiń barlyǵy Aqtaý qalasynda ósirilgen, ıaǵnı barlyq aǵash pen kógaldar Mańǵystaý oblysynyń qurǵaq klımatyna tózimdi, – deıdi A.Týlıakov.

Jasyl jelekterdi sýarý ju­mystary bıyl Aqtaýda al­­ǵash ret sý qubyry arqyly júr­gizile bas­tady. Jyldar boıy teńizge ketip jatqan jerasty tushy sýlaryn tıimdi paıdalaný úshin qalanyń ortalyq bólikterine, saıabaqtar men alańdarǵa uzyndyǵy 55 shaqyrymdy quraıtyn qubyr tartyldy. Qazirgi tańda atalǵan qubyrlardyń 45 shaqyrymy iske qosylǵan. Qalǵan 10 shaqy­rymyna aǵymdaǵy jóndeý ju­mystary júrgizilýde. Maýsym aıynyń sońyna deıin tolyqtaı iske qosylmaq. Jasyl jelekti sýarý úshin Aqtaýda táýligine 1 700 tekshe metr sý tutynylady.

Sondaı-aq shaǵyn aýdan boıyn­daǵy jasyl jelekti sýa­rý úshin GreenCityAktau JShS jyl sońyna deıin taǵy 40 shaqyrym sý qubyryn iske qosýdy josparlap otyr. Qazirgi tańda onyń 13 shaqyrymy 1, 2, 3, 3a, 3b, 4-shaǵyn aýdandaryna júrgizilip, iske qosyldy.

– Shaǵyn aýdan ishindegi jasyl jelekterdi sýarý úshin qazirgi tańda múlik ıeleriniń birlestigi jáne turǵyn úılerge qyzmet kórsetýshi mekemelermen kelissózder júrgizilip, kelisimshartqa otyrmaqpyz. Sondaı-aq qosymsha 30 dana arnaıy sý tasýshy kólikter qalanyń jasyl jelekterin sýarýda. Biri jer astynda, ekinshisi jer ústinde ornalasqan 60 tekshe metrlik qos rezervýar bar. Operator kún saıyn tańǵy saǵat 6-da kelip, nasostardy qosady. Saǵat 7:30-dan kólikter kelip, sý toltyryp alady. Birinshi aýy­symda saǵat 8:00-16:00 deıin 80-ge jýyq adam jumys isteıdi. Osy ýaqyt aralyǵynda kóshe boıyndaǵy aǵashtardy sýarady. Jasyl jelekti, gazondardy qyrqady. Ekinshi aýysym saǵat 16:00-de bastalady, 20 adam shaǵyn aýdan ishin sýarady. Bir shaǵyn aýdanǵa shamamen 10 kúnde qaıtyp keledi, – deıdi A.Týlıakov.

Qazirgi tańda GreenSity­Aktau JShS-i mekemesi tal­dardy dezınfeksııalaý ju­mys­taryn da júrgizip jatyr. Bul iske «BI-58» jáne «Karate» dep atalatyn ý túrleri qoldanylýda. Qazirgi tańda qala aýmaǵynda 40 myńǵa jýyq jasyl jelek zararsyzdandyrýdan ótti, bul jumys áli de jalǵasady.

Aqtaýda jyl saıyn qyrýar qarajatqa aǵash, gúl túrleri ósiriledi. Biraq kúnniń ystyǵy jáne sýdyń jetispeýi saldarynan jelekterdiń jaıqalyp ket­kenin kórgen joqpyz. Endi iske memleket-jekemenshik árip­testik jobasy aıasynda kirisse, qalanyń sáni kirip, jelekter shahardyń shyraıyn keltirer dep oılaımyz.

Mańǵystaý oblysy