«Búgingi kúni BN-350 reaktorlyq qondyrǵysynyń paıdalanylǵan ıadrolyq otyny 60 metall beton konteınerge salynyp, burynǵy Semeı ıadrolyq synaq polıgonynyń aýmaǵynda uzaq merzimdi saqtaýǵa ornalastyryldy. 2011 jyldan beri paıdalanylǵan ıadrolyq otyndy qorǵaý, ıadrolyq jáne radıasııalyq qaýipsizdikti qamtamasyz etý jónindegi jumystar respýblıkalyq bıýdjet esebinen qarjylandyrylady. Bul rette BN-350 reaktorlyq qondyrǵysynyń ǵımarattary men qurylystaryn qaýipsiz saqtaý maqsatynda «BN-350 reaktorlyq qondyrǵysyn paıdalanýdan shyǵarý jobasy» tehnıkalyq-ekonomıkalyq negizdemesi ázirlendi. Osy negizdemege sáıkes 114,8 mlrd teńge (2022-2032 jyldardaǵy baǵa) mólsherinde qarjylandyrý kózdelgen, onyń ishinde qurylys-montajdaý jumystary – 36 077,6 mln teńge, jabdyqtar – 48 583,3 mln teńge, basqalary – 30 118,6 mln teńge», delingen Álıhan Smaıylovtyń jaýabynda.
Onyń aıtýynsha, kelesi kezeń reaktor qondyrǵysynyń birinshi kontýryndaǵy suıyq metall natrııdi jáne suıyq radıoaktıvti qaldyqtardy óńdeýdiń tıimdi jáne ońtaıly ádisteri men tehnologııalaryn tańdaý bolyp otyr. Qazir Energetıka mınıstrligi Atom energııasy jónindegi halyqaralyq agenttikpen birlesip, jyldam neıtrondy reaktorlardy paıdalanýdan shyǵarý kezinde týyndaıtyn problemalar jáne olardy sheshý joldary boıynsha konsýltasııalar júrgizýde.
«Halyqaralyq sarapshylardyń pikirin eskere otyryp, tehnologııany tańdaý qorytyndylary boıynsha zańnamada belgilengen tártippen BN-350 reaktorlyq qondyrǵysyn uzaq merzimdi qaýipsiz saqtaý jaǵdaıyna keltirý jónindegi jumystar júrgiziledi. Naqty jobalar boıynsha jumystardyń túpkilikti quny jobalaý-smetalyq qujattamany ázirleý nátıjeleri boıynsha aıqyndalady», dep atap ótti Premer-Mınıstr.
