Qazaqstan • 21 Maýsym, 2022

Elektrondy eńbek bırjasynda bos jumys oryndarynyń onlaın-jármeńkesi ótedi

43 ret kórsetildi

Qazaqstannyń iri jumys berýshileri jastarǵa arnalǵan alǵashqy bos jumys oryndarynyń onlaın-jármeńkesine qatysady, dep habarlaıdy Egemen.kz Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

27-29 maýsym kúnderi Elektrondy eńbek bırjasynda qazaqstandyq kompanııalardyń HR-menedjerleri óz mekemesin tanystyrady. Olardan ár úmitker ózin qyzyqtyrǵan aqparatty suraı alady. Bos jumys oryndary jármeńkesine 18-35 jas aralyǵyndaǵy ár Qazaqstan azamaty qatysýǵa quqyly. Ol úshin Enbek.kz portalynda tirkeýden ótý qajet.

Tirkelý úshin portaldyń basty betindegi jármeńke bannerin basyp, ótinim berý kerek. Onda jármeńkege qatysý erejelerimen jáne baǵdarlamasymen tanysýǵa bolady.

Bos jumys oryndary jármeńkesinde jumys berýshiler onlaın-tanystyrylym ótkizip, ózderiniń kompanııasy, eńbek jaǵdaıy, bos jumys oryndary jáne ózge de aqparat týraly aıtyp beredi.

Jármeńkede 1300-den astam bos jumys ornyn Eýrazııalyq topqa (ERG) jáne Respýblıkalyq taý-ken óndirýshileri jáne taý-ken metallýrgııalyq kásiporyndar qaýymdastyǵynyń quramyndaǵy kompanııalar, «Kaspı Bank» AQ, «Qazaqstan Halyq Banki» AQ, «Ernst & Young Kazakhstan» JShS, «Evrazııa grýpp Qazaqstan»  JShS, «Magnum Cash & Carry» JShS, «Birinshi nesıe bıýrosy» JShS jáne basqa da kompanııalar usynady.

Qatysýshylar kompanııalardaǵy bos oryndarǵa  qyzyǵýshylyq tanytqan jaǵdaıda túıindemesin jibere alady. Sondaı-aq aldyn ala  ótinim boıynsha qatysýshylardyń tizimi jasalady, olar kompanııanyń HR-menedjerimen onlaın suhbattasa alady.

Elektrondy eńbek bırjasyndaǵy onlaın-jármeńkeni Eńbek jáne halyqty áleýmettik qorǵaý mınıstrligi men «Eńbek resýrstaryn damytý ortalyǵy» AQ birlesip uıymdastyrdy.

Jármeńke jumys izdeýshige jumys tabýdy jeńildetedi. Al jumys berýshilerge bos jumys ornyna laıyqty qyzmetker tabýǵa múmkindik beredi.

Sońǵy jańalyqtar

Elorda «jasyl» aımaqqa ótti

Koronavırýs • Keshe

Uqsas jańalyqtar