Ǵalymnyń Ál-Farabı kitaphanasynda ótken alǵashqy kóshbasshylyq dárisi «Ejelgi dáýirdegi demografııalyq damý kórsetkishi jáne adamzattyń bolashaǵy (matematıkalyq modeldeý jáne kompıýterlik boljaý)» taqyrybyn qamtydy.
Stýdentter saraıynda ótken ekinshi dáris «Sıfrlyq ekonomıka (nusqalar men boljamdar)» taqyrybyna arnaldy.
Kezdesýdi ashqan Ál-Farabı atyndaǵy Qazaq ulttyq ýnıversıtetiniń Basqarma Tóraǵasy – Rektory Janseıit Túımebaev Asqar Aqaıulynyń qyzmettik jolyna toqtalyp, álemdik ǵylymdaǵy jetistikterin atap ótti.
Asqar Aqaev óz dárisinde damyǵan ozyq memleketterdiń sıfrlyq ekonomıkany qurýdaǵy tabystaryna taldaý jasap, damýshy elderdiń ekonomıkalyq baǵyttaryna saraptama jasady. «Búginde dástúrli ekonomıkaǵa qaraǵanda, aqparat pen bilimge negizdelgen sıfrlyq ekonomıkanyń matematıkalyq taldaýymen qarqyndy jumys júrgizilýde. Klassıkalyq ekonomıkalyq dınamıka Kobb-Dýglas tıpiniń óndiristik fýnksııasyna negizdelgen, ol úsh negizgi faktorǵa – kapıtalǵa, eńbekke jáne tehnologııalyq progreske baılanysty. Eń qıyn mindet – tehnologııalyq progresti modeldeý. Sondyqtan tehnologııalyq progrestiń ekzogendik jáne endogendik modelderin jasaǵany úshin Nobel syılyǵy R.Soloý men P. Romerge berildi. Alaıda, bul modelderde aqparat óndirisiniń dınamıkasy joq», – dedi professor.
Kórnekti ǵalym Asqar Aqaev sıfrlyq ekonomıkanyń búgini men bolashaǵy týraly óz kózqarasyn usyna otyryp, ózi ázirlegen sıfrlyq dáýirge arnalǵan tehnologııalyq progrestiń aqparattyq modelderi jáne sıfrlyq ekonomıkaǵa arnalǵan óndiristik fýnksııa jaıly baıandady. «Adam jáne ıntellektýaldy mashına» úılesimi – sıfrlyq dáýirde eń ónimdi kúshke aınalmaq. Osy ssenarııdi iske asyrý úshin irgeli STEM-bilim alý qajettigi aıtyldy.
Kóshbasshylyq dárisinde úlken tájirıbesimen bólisken akademık Asqar Aqaev oqytýshy-professorlar men bilim alýshy jastardyń suraqtaryna jaýap berdi.
Jıynda sóz alǵan QR UǴA prezıdenti Murat Jurynov Asqar Aqaıulynyń Qazaqstan Respýblıkasy Ulttyq ǵylym akademııasynyń múshe-akademıgi bolyp qabyldanǵanyn qýanyshpen jetkizip, arnaıy kýálik tabys etti.
Qazaqstan Respýblıkasy men Qyrǵyz Respýblıkasynyń Halyq ártisi, Memlekettik syılyqtyń laýreaty Altynbek Qorazbaev «Narynnan jazǵan sálem hat» ánin oryndap, ánnen shashý shashty.
Qadirmendi qonaq QazUÝ basshylyǵyna qonaqjaılyǵy úshin alǵys bildire otyryp, Qazaqstan men Ortalyq Azııadaǵy jetekshi ýnıversıtette kóshbasshylyq dáris oqyǵanyna rızashylyǵyn bildirdi.
Kezdesý sońynda rektor Janseıit Túımebaev QazUÝ Ǵylymı keńesiniń sheshimimen Asqar Aqaevty «Ál-Farabı atyndaǵy QazUÝ-dyń Altyn medalimen marapattady.
Kóshbasshylyq dáristerge QR UǴA akademıkteri, belgili ǵalymdar, ǴZI basshylary, QazUÝ Dırektorlar keńesiniń músheleri, qalamgerler, óner qaıratkerleri, BAQ ókilderi, bilim ordasynyń oqytýshy-professorlar quramy men stýdentteri qatysty.
Sondaı-aq qurmetti qonaq sapar barysynda QazUÝ mýzeıimen tanysyp, sońǵy úlgidegi oqý ǵımarattaryn, jańarǵan aýdıtorııalardy, ǵylymı laboratorııa men zertteý ortalyqtaryn aralady.
Aıana Toǵanbek
