Parlament • 23 Maýsym, 2022

Senat volonterlik qyzmetti damytýǵa arnalǵan zańdy qabyldady

17 ret kórsetildi

Senat Spıkeri Máýlen Áshimbaevtyń tóraǵalyǵymen Palata otyrysy ótti. Onda depýtattar birqatar zań jobasyn qarady, dep jazady Egemen.kz.

Otyrys barysynda qabyldanǵan «Qazaqstan Respýblıkasynyń keıbir zańnamalyq aktilerine strestik aktıvter naryǵyn damytý máseleleri boıynsha ózgerister men tolyqtyrýlar engizý týraly» zań Memleket basshysynyń tapsyrmasy boıynsha qolǵa alyndy. Atalǵan qujat strestik aktıvter naryǵynda qoldanylatyn normatıvtik-quqyqtyq bazany jetildirýge baǵyttalǵan.

«Bul zań Memleket basshysynyń tapsyrmasy boıynsha qabyldanyp otyr. Jańa normalar strestik aktıvter naryǵynda qoldanylatyn quqyqtyq tetikterdi jetildirýge jáne osy salanyń ósýine jaǵdaı jasaýǵa arnalǵan. Sondaı-aq zań ınvestorlardyń strestik aktıvter naryǵyna qol jetkizýin qamtamasyz etý arqyly osy baǵytty odan ári damytýdy kózdeıdi. Jańa talaptar bul saladaǵy rásimderdiń ashyqtyǵy men aıqyndyǵyn da qamtamasyz etedi. Aldaǵy ýaqytta Zań problemalyq aktıvterdi ekonomıkalyq aınalymǵa tartýǵa múmkindik bere otyryp, bıznes ortany jaqsartýǵa oń áserin tıgizedi dep senemiz», dedi Máýlen Áshimbaev.

Senatorlar otyrys kezinde «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń Kodeksine (Salyq kodeksi) jáne «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń Kodeksin (Salyq kodeksi) qoldanysqa engizý týraly» Qazaqstan Respýblıkasynyń Zańyna ózgerister men tolyqtyrýlar engizý týraly» jáne «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zańdardy eki oqylymda qarap, qabyldady.

Sondaı-aq depýtattar «Qazaqstan Respýblıkasynyń keıbir zańnamalyq aktilerine quqyq qorǵaý qyzmetin ótkerý tártibin jetildirý, quqyq qorǵaý organdary, arnaýly memlekettik organdar qyzmetkerleriniń jáne áskerı qyzmetshilerdiń quqyqtyq jáne áleýmettik qorǵalýy men jaýaptylyǵyn arttyrý, vedomstvoaralyq úılestirý, ishki ister organdarynyń derbestigi, jekelegen qylmystyq quqyq buzýshylyqtar úshin jaýaptylyqty kúsheıtý jáne qarý aınalymy máseleleri boıynsha ózgerister men tolyqtyrýlar engizý týraly» zańdy da eki oqylymda qabyldady.

Qujat kadrlyq qamtamasyz etý, áskerı qyzmetti ótkerý jáne áleýmettik qamtamasyz etý salalaryn jetildirýdi kózdeıdi. Sondaı-aq jańa normalar polıseılerdiń quqyqtyq mártebesi men qorǵalýyn arttyrýǵa baǵyttalyp otyr.

Sonymen qatar Palata otyrysynda depýtattar volonterlik qyzmetti odan ári damytýǵa arnalǵan «Qazaqstan Respýblıkasynyń keıbir zańnamalyq aktilerine volonterlik qyzmet, qaıyrymdylyq, memlekettik áleýmettik tapsyrys, strategııalyq áriptestikti iske asyrýǵa arnalǵan memlekettik tapsyrys, úkimettik emes uıymdarǵa arnalǵan granttar men syılyqaqylar, dárilik qamtamasyz etý jáne áleýmettik qamsyzdandyrý máseleleri boıynsha ózgerister men tolyqtyrýlar engizý týraly» zańdy qabyldady. Bul jóninde pikir bildirgen Máýlen Áshimbaev zań birqatar qoǵamdyq qatynasty retteıtin zańnamany odan ári jetildiretinin aıtty.

«Osy zań arqyly azamattardyń qaıyrymdylyq pen volonterlikke júıeli negizde qatysýyn yntalandyrý kózdelgen. Sondaı-aq bul qujat osyndaı áleýmettik paıdaly qyzmetpen aınalysý mádenıetin damytý úshin qolaıly quqyqtyq orta qalyptastyrady. Zańda granttyq qarjylandyrý prosesiniń ashyqtyǵyn, úkimettik emes uıymdardyń áleýetin jáne olardyń turaqty damýyn arttyrýǵa arnalǵan normalar bar. Sonymen qatar halyqqa dárilik zattar men medısınalyq qyzmetterdiń qoljetimdiligin qamtamasyz etetin quqyqtyq sheshimder belgilengen. Aldaǵy ýaqytta bul Zań elimizde qaıyrymdylyq pen volonterlik qyzmetti odan ári damytýǵa oń septigin tıgizedi dep senemiz», dedi Senat Tóraǵasy.

Palata otyrysynda depýtat Narıman Tóreǵalıev Senattyń Áleýmettik-mádenı damý jáne ǵylym komıtetiniń tóraǵasy bolyp saılandy. Buǵan deıin osy qyzmetti atqarǵan Beıbit Isabaev Memleket basshysynyń Jarlyǵymen Jetisý oblysynyń ákimi bolyp taǵaıyndalǵany belgili. Soǵan baılanysty Ortalyq saılaý komıssııasynyń Qaýlysyna sáıkes onyń depýtattyq ókilettigi toqtatyldy.

Odan bólek, otyrysta senatorlar depýtattyq saýaldaryn joldady.

Asqar Shákirov bastaǵan bir top depýtat Aral óńirindegi ekologııalyq problemalardy sheshýge qatysty Úkimettiń jumysyn jańdandyrý mańyzdy ekenine nazar aýdardy.

Janbolat Jórgenbaev jaıylym jerlerdiń tapshylyǵyna qatysty máseleni sheshý sharalaryn usyndy.

Sońǵy jańalyqtar

TúrkPA-nyń ataýy ózgeredi

Parlament • Keshe

Almaty joldaryn sý basty

Aımaqtar • Keshe

Álemde altyn arzandady

Álem • Keshe

Uqsas jańalyqtar