Sport • 24 Maýsym, 2022

Qostanaıda VII «Buqaralyq sport Olımpıadasy» aıaqtaldy

26 ret kórsetildi

Búgin Qostanaı qalasynda VII Halyq sporty oıyndary aıaqtaldy, dep habarlaıdy Egemen.kz.

Buqaralyq sport Olımpıadasy atalyp ketken básekede sońǵy bolyp qol kúres pen shaǵyn fýtbol sheberleri kim myqtyny anyqtady.

Top jarǵan komanda men júldegerlerdi marapattaý rásimine Respýblıkalyq Sportty damytý dıreksııasy Buqaralyq sport túrleri basqarmasynyń basshysy Ǵazız Serikbaev, Qostanaı oblysy sport jáne dene shynyqtyrý basqarmasynyń basshysynyń orynbasary Elena Kıreeva qatysty.

«Búginde bul keshendi báseke sporttyń buqaralyq sıpat alýyna kóp úles qosty deýge bolady. Ár oblystyń, qalanyń túkpir-túkpirinde irikteý ótip, halyq arasynda keń tanylyp úlgerdi. Bıyl osy kezeńderden súrinbeı ótken 1200-den astam sportshy osynda óz oblysynyń namysyn abyroımen qorǵady. Tartysqa toly jarystarda el ishinen shyqqan tańdaýly sportshy ekenin pash etti. Buǵan osynda jınalǵan siz ben biz kýá boldyq.

Osy tusta bıylǵy keshendi jarysty joǵary deńgeıde uıymdastyrǵan Qostanaı oblysy ákimdigine, sonyń ishinde oblystyq sport basqarmasyna erekshe alǵys aıtamyn. Endi 4 jyldan keıin 8-shi Halyq sporty oıyndaryn túrki áleminiń rýhanı astanasy Túrkistan qabyldaıdy. Jas oblys osy mejeden túspeı, jarystyń mártebesin arttyra túsedi dep senemiz», dedi Ǵazız Serikbaev.

Aıta keteıik, Qostanaıdaǵy Halyq sporty oıyndaryna 17 komandanyń 1200-den astam sportshysy qatysty. Olar 10 kún boıy 9 sport túri – shaǵyn fýtbol, basketbol (3h3), voleıbol (erler, áıelder), ústel tennısi, qazaq kúresi, asyq atý, toǵyzqumalaq, gir sporty men qol kúresten synǵa tústi. Sondaı-aq ár óńirden kelgen 200-ge jýyq tóreshi básekelerdiń barynsha ádil ótýine at salysty.

Sońǵy jańalyqtar

Uqsas jańalyqtar