Jol. Kólik. Júk

Kólik jáne kommýnıkasııa mınıstrligi 2016 jylǵa deıin kólik salasyn damytý josparyn bekitti. Atalǵan jospar 2014 jylǵy  elimizdiń áleýmettik-ekonomıkalyq saıasatynyń birinshi kezekti is-sharalary jol kartasyn iske asyrý aıasynda jasalǵan. Oǵan tranzıtti ulǵaıtý, ınvestısııalar men jańa tehnologııalardy tartýǵa baǵyttalǵan 70 is-shara kirgen. Bul jaıynda keshe Prezıdent janyndaǵy Ortalyq kommýnıkasııalar qyzmetinde ótken dástúrli brıfıngte Kólik jáne kommýnıkasııa mınıstrligi  Kóliktik baqylaý komıtetiniń tóraǵasy Áset Asavbaev aıtty. «Kólik jáne logıstıkalyq ınfra­qurylymdy ártaraptandyrý maqsatynda mınıstrlik naqty is-sharalar keshenin jos­parlady. Onyń negizgi baǵyttaryna memleket jekemenshik seriktestigi tetigin paıdalanyp, sheteldik ınvestısııalardy tartý jáne birikken uıymdar  qurý arqyly Aqtaý teńiz portynda 3 qurǵaq júk termınaldaryn salý, «Qorǵas – Shyǵys joldary» arnaıy ekonomıkalyq aımaǵy  «Jezqazǵan – Beıneý» temirjol jelisinde qozǵalysty ashý kiredi», dedi Kóliktik baqylaý komıtetiniń tóraǵasy. Qazirgi tańda mınıstrlik portty soltústik baǵytqa qaraı keńeıtý ju­mystaryn júrgizýde. Áset Asavbaevtyń aı­týynsha, porttyń keńeıtilýi onyń ótki­zilim múmkindigin, qurǵaq júkti aýystyryp tıeýdi jylyna 2,5 mln. tonnaǵa kóbeıtpek.   Sondaı-aq, jospar boıynsha «Qorǵas – Shyǵys joldary» AEA aımaǵynda qurǵaq port qurylysyn qamtamasyz etý sharalary da qarastyrylǵan. «Jetigen – Qorǵas» temirjoly men «Batys Eýropa – Batys Qytaı» dálizi áleýetterin paıdalanyp, qurǵaq port salý iri logıstıkalyq hab qalyptastyrýǵa jaǵdaı jasamaq. Avtomobıl, temirjol jáne áýe ınfraqurylymymen baılanysty konteınerlik, júk jáne qoıma qyzmetteriniń ıntegrasııasy Azııadan Batys Eýropaǵa, TMD jáne Shyǵys baǵytyna júkterdi tasymaldaıtyn klıentterge bir jerde logıstıkalyq qyzmet kórsetýge múmkindik bermek.  Porttyń qurylysy 2014 jyldyń shildesinde bastalady. Sonymen qatar, «Jezqazǵan – Beıneý» temir jol jelisinde qozǵalysty ashý josparlanǵan. 2013 jyly «Jezqazǵan – Beıneý» jáne «Arqalyq – Shubarkól» temirjoldarynyń bas baǵyttaryn túıistirý iske asyrylǵan. Atalǵan ýchaskelerde qurylystyń jal­ǵastyrylyp jatqanyna baılanysty, stansalar men razezderdegi ınfraqurylym nysandaryn jáne áleýmettik-turmystyq ǵımarattar salýǵa 10 myńnan astam adam jumyldyrý kózdelgen. Ábdirahman QYDYRBEK, «Egemen Qazaqstan».