Túrkistan oblysy, Báıdibek aýdany sáýlet-kórkem mýzeıinde erekshe daryn ıesi Isa Baızaqovtyń dombyrasy saqtalǵan. Aqynnyń dombyrasy qart Qarataýdyń qoınaýyndaǵy Báıdibek aýdanyna qalaı keldi?
Sonaý surapyl soǵys jyldarynda shejireli Shaıan óńirine aqyn Isa Baızaqov keledi. Sum soǵys eńsesin ezgen el aqyndy qushaq jaıa qarsy alady. Jaıbaraqat tirshiliktiń astan-kestenin shyǵarǵan soǵystyń aýyr, beınetti tirshiliginen, azamattarynan aıyrylyp qamyqqan qalyń jurt aqynnyń jyr-dastandaryn tańǵa deıin tyńdap bir serpilip qalady.
Aqyn aýyldardy aralap, kópshilikti án-jyrymen rýhtandyryp júrgende Batystaǵy áskerlerimizden «1943 jyldyń 2 aqpanynda Don maıdanynyń áskerleri Stalıngrad túbinde qorshaýǵa alynǵan nemis armııasyn tolyq talqandady» degen jaqsy jańalyq jetedi. Soǵystyń árbir sátin qalt jibermeı,«Bári de maıdan úshin!» dep aýyr beınetti arqalap júrgen aýyldaǵylar bul jeńiske shat-shadyman qýanypty. Qazaq tabaldyryq attaǵan ár qonaǵyn kut sanaǵan emes pe? Aýyl turǵyndary da Isa aqyndy qut kórip, súıinshi suraıdy. Darqan kóńildi aýyldaǵylarmen qosa qýanǵan aqyn súıinshige óziniń qımas serigi dombyrasyn bergen eken. Mundaı márttikti kútpegen jurtshylyq aqynǵa «jar degende jalǵyz dombyrańyzdan qalaı aıyramyz» dep qynjylypty. Sonda «Ýa, kópshilik, izetke naıza boılamas, men súıinshilegen elge shyn kóńilmen berdim dombyramdy» dep aǵynan jarylǵan eken aqyn.
Soǵys aıaqtalyp bul oqıǵa da umyt bolady. Isa aqynnyń dombyrasy da el jadynan shyǵyp ketedi. Arada biraz jyldar ótken soń, osy oqıǵadan habary bar Aqtas aýylynyń turǵyny Oryntaı Atabekov óziniń naǵashysynan aqynnyń dombyrasyn alyp kelip, mýzeıge ótkizedi.
Búginde Isa aqynnyń dombyrasy mýzeı tórinen oryn alǵan qundy jádigerlerdiń biri.
Elmıra JAMAShOVA,
Sáýlet-kórkem mýzeıiniń qyzmetkeri
Túrkistan oblysy,
Báıdibek aýdany
