Aımaqtar • 29 Maýsym, 2022

Semeı qalasynyń gerbi bekitildi

Semeı qalasy máslıhatynyń kezekti 25-shi sessııasy ótip, onda depýtattar qalanyń gerbi men onyń tolyq sıpattamasyn bekitti. Sondaı-aq, jıyn barysynda jergilikti atqarýshy organǵa gerbti paıdalaný tártibin anyqtaý usynyldy.

Egemen Qazaqstan

Semeı qalasynyń jańa gerbinde qalanyń rýhanı, tarıhı, tabıǵı jáne zamanaýı kelbeti kórinis tapqan. Eltańbanyń avtory – qalalyq mádenıet saraıynyń qoıýshy sýretshisi Erlan Ámirbek.

Avtordyń aıtýynsha, gerbtiń sheńber túrinde bolýy máńgiliktiń sımvolyn aıshyqtaıdy. Máselen, jasyl tús – tabıǵattyń, úılesimdilik pen tepe-teńdiktiń sımvolyn bildiredi. Geraldıka zańdary boıynsha kún ómir jolyn sıpattaıtyn bul tús aımaqtyń qaıta jańǵyrýymen de baılanysty.

Gerbtiń ishinde baqyt sımvoly oıý-órnekpen kómkerilgen shańyraq beınesimen berilgen. Aıqas tórt bóliktiń (kúldireýishter) arasynda kitap, qaraǵaı, túıe jáne kópirdiń sulbasy beınelengen. Bul barlyq tórt bóliktiń teńdiginiń dálelin túsindiredi. Kitap Semeı qalasyn elimizdiń rýhanı-mádenı ortalyǵy, Abaı, Shákárim, kórnekti jazýshy M.Áýezov syndy uly oıshyldardyń Otany retinde beınelese, shańyraqtyń sol jaq bóliginde ornalasqan qaraǵaı sýreti óńirdiń tabıǵı beınesiniń ajyramas bóligin aıshyqtaıdy. Al túıeler – ǵasyrlar júgin arqalaǵan dala kemesindeı eski gerbtiń tarıhı qundylyǵyn beıneleıdi. Revolıýsııaǵa deıin Semeı qalasy Reseı men Batys Qytaı qalalarynyń saýda ortalyǵy bolǵany jáne Jibek jolynyń bóligi sanalǵany tarıhtan belgili. Al jańa kópir – zamanaýı jetistikterdiń kórsetkishi jáne Semeı qalasynyń kórikti jeri sanalady.

Gerbte «Semeı» ataýy sımvoldyń tómengi jaǵynda ornalasqan jáne altyn áriptermen jazylǵan. Altyn tús – ál-aýqat pen órkendeýdiń sımvoly. Sary jáne kók tústiń aralasýy jasyl túske aınalyp, jomarttyqtyń, jandanýdyń jáne jaqsy istiń bastamasynyń sımvolyn bildiredi.

«Beıbitshilik» aralynyń «Túıemoınaq» stellasyndaǵy jeti qarlyǵashtyń beınesi – qyryq jylǵy atom synaqtaryn jeńgeniniń aıqyn kórinisi sanalady. Qazaq halqy úshin jeti sany qasıetti, «Jeti urpaq», «Jeti qara» sekildi kóptegen uǵym osy sanmen baılanysty. Al qarlyǵashtardyń shańyraqty aınala ushýy sheksizdikti, qalaǵa máńgilik beıbitshilik pen kelisim tileıdi. О́ıtkeni kıeli sanalatyn qarlyǵash qustyń óz uıasyn beıbitshilik pen tynyshtyq ornaǵan shańyraqqa ǵana salatyny barshaǵa belgili.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz