Maýsymnyń qorytyndysy boıynsha, teńge baǵamy 1 dollar úshin 470,24 teńgege deıin nemese 13,3 paıyzǵa álsiregen. Qazaqstan qor bırjasyndaǵy saýda-sattyqtyń ortasha kúndik kólemi bir aıda 115 mıllıon AQSh dollarynan 96,4 mıllıon AQSh dollaryna deıin tómendegen.
«Energııa tasymaldaýshylardyń qolaıly baǵasyna qaramastan, ulttyq valıýta baǵamy shekteýli valıýta usynysy men valıýtaǵa degen suranystyń bir ýaqytta ósýi aıasynda álsiredi. Valıýta usynysynyń tómendeýi – eksporttaýshylardyń salyq tóleý úshin valıýta satýdy qysqartýyna, al suranystyń ósýi dıvıdend tóleýdiń bastalýyna baılanysty boldy», delingen habarlamada.
Valıýta naryǵyna kvazımemlekettik sektor sýbektileriniń valıýtalyq túsimdi satýy qoldaý kórsetti, ol shamamen 480,4 mıllıon AQSh dollary bolǵan.
«Maýsymda Ulttyq qordan respýblıkalyq bıýdjetke transfertterdi qamtamasyz etý úshin valıýta 438,3 mıllıon AQSh dollaryna satyldy», delingen UB habarlamasynda.
Bul rette Ulttyq qordan satý úlesi saýda-sattyqtyń jalpy kóleminiń 20,7 paıyzy bolǵan.
«Maýsym boıy ishki valıýta naryǵynda Ulttyq Bank valıýtalyq ıntervensııalardy, sondaı-aq BJZQ-nyń zeınetaqy aktıvteri men senimgerlik basqarýdaǵy basqa da qorlar úshin shetel valıýtasyn satyp alý nemese satý boıynsha operasııalardy júzege asyrǵan joq», delingen habarlamada.
Qysqa merzimdi perspektıvada teńgeniń qubylmalylyǵy geosaıası jaǵdaıdyń ózgerýine, ishki qatysýshylardyń kútýlerine jáne álemdik naryqtardaǵy ahýalǵa baılanysty bolatyny aıtyldy.
