Osyǵan oraı Agenttik tóraǵasy men oblys ákiminiń orynbasary Vıktor Ionenko jáne IIDM Qurylys jáne turǵyn-úı kommýnaldyq sharýashylyǵy isteri komıteti turmystyq qatynastar basqarmasynyń basshysy Sultanǵalı Jalqul, Ulttyq ekonomıka mınıstrligi Tabıǵı monopolııalardy retteý komıteti oblystyq departamentiniń basshysy Aqan Tashpaev, taǵy da basqa tıisti mekemelerdiń basshylarynan quralǵan jumys toby Qostanaı qalasy men birqatar aýdan-qalalarda jergilikti jurtpen kezdesip, aldaǵy ýaqytta engizilmek qanatqaqty jobanyń aıasynda bolatyn ózgeristerdiń jaı-japsaryn túsindirdi. Bul kezdesýlerge jergilikti qoǵamdyq keńesterdiń músheleri, oblystyq jáne qalalyq máslıhat depýtattary, «Atameken» kásipkerler palatasynyń óńirdegi ókilderi, monopolııaǵa qarsy departament janyndaǵy Kedergiler jónindegi keńes músheleri, kommýnaldyq jáne energııa tasymaldaıtyn kásiporyndardyń basshylary da qatysty.
Búginde energııamen qamtamasyz etetin mekemelerdiń tarıfteri turmystyq tutynýshylar, zańdy tulǵalar jáne bıýdjettik mekemeler bolyp úsh topqa jikteledi. Serik Jumanǵarınniń aıtýynsha, buǵan deıin zańdy jáne bıýdjettik tutynýshylardyń tarıfi jasandy ulǵaıtylyp, sonyń esebinen turmystyq tutynýshylardyń tarıfi tómendetilip kelgen. Elektr qýatyn taratýdaǵy ádil bólinistiń joqtyǵy kásipkerlerge aýyrtpalyq artyp otyr. Máselen, dıfferensııaly tarıftiń saldarynan elimizdegi shaǵyn jáne orta bıznes jyl saıyn 31 mlrd teńge kóleminde artyq tólem jasaýǵa májbúr bolyp keledi. Elektr qýatyn iri kólemde tutynýshy bolyp esepteletin shaǵyn jáne orta bıznes qýatty elektr stansalarynan tikeleı satyp alatyndyqtan, olar dıfferensııaly tarıfke enbeıdi.
– Qanatqaqty joba kásipkerlikti damytý jónindegi Ulttyq jobanyń aıasynda iske asyrylyp jatyr. Dıfferensııaly tarıf aldaǵy birneshe jyldyń ishinde túbegeıli joıylady. 2022 jyldyń 2 naýryzynda Memleket basshysy energetıka jáne ınjenerlik ınfraqurylymdy damytý jóninde keńes ótkizgen bolatyn. Osy keńes barysynda bul mindetti qanatqaqty joba rejiminde Almaty, Batys Qazaqstan jáne Qostanaı oblystarynda qolǵa alý týraly tapsyrma berildi. Buryn tutynýshylardy elektr energııasymen bir ǵana monopolııalyq kompanııa qamtamasyz etip kelse, búgingi tańda elimiz boıynsha elektr energııasyn jetkizetin jáne rettep otyratyn 36 mekeme jumys isteıdi. Olardyń árqaısysy jeke-jeke óńirlerge qyzmet kórsetedi. Osydan kelip tutynýshynyń kúni bir ǵana qyzmet kórsetýshige qarap qalyp otyr. Al qoldanystaǵy zań boıynsha elektrmen qamtamasyz etý qyzmeti ashyq básekelestik ortada júzege asyrylýǵa tıis. Qazaqstanda, joǵaryda atalǵan 36 mekemeniń syrtynda, elektr energııasyn jetkizýmen aınalysatyn shamamen 180 mekeme jumys isteıdi. Mundaı mekemelerdiń sany ár óńirde beseýden kem emes. Búginde dıfferensıasııa elektr qýatyn taratatyn eski kompanııalar men jańa kompanııalardyń arasyndaǵy ashyq básekelestikke kedergi keltirip otyrǵanyna kóz jetkizip otyrmyz. Demek tutynýshylar da ózderi qalaǵan mekemeni tańdaý quqyǵynan aıyrylyp, basqa mekemege aýysý múmkindigi shektelip otyr. Munyń syrtynda, dıfferensıasııa arqyly jasyryn sýbsıdııaǵa da jol berilip jatyr. Qazirgi jaǵdaıda kimde-kim qýat kózin kóp jumsasa, sýbsıdııa túrindegi qoldaýǵa da sol kóbirek ıe bolyp otyr. Osynyń saldarynan, áleýmettik qoldaýdyń eń basty qaǵıdaty iske asyrylmaı keledi, ıaǵnı memlekettiń qoldaýy naǵyz muqtaj mekemege jetpeı otyr. Nátıjesinde, kásipkerler elektr qýatyn jetkizýge ketken shyǵyndardy taýardyń, ózderi atqarǵan jumys pen kórsetken qyzmetiniń qunyna qosatyndyqtan, jasyryn sýbsıdııanyń óteýi túptep kelgende báribir tutynýshylardyń qaltasynan tólenip jatyr, – dedi Serik Jumanǵarın.
Qanatqaqty joba aıasynda Qostanaı oblysynyń turǵyndary budan bylaı, tutynylatyn qýat kólemine qaraı, elektr qýaty úshin aı saıyn orta eseppen 200 teńgedeı artyq tóleıtin bolady. Áleýmettik osal toptaǵylar úshin tarıf quny burynǵysha qalady. Mundaı turǵyndardyń tólem aıyrmashylyǵy memlekettiń ataýly áleýmettik kómeginiń esebinen sýbsıdııalanady.
Indýstrııa jáne ınfraqurylymdyq damý mınıstrliginiń ókili Sultanǵalı Jalquldyń aıtýyna qaraǵanda, aldaǵy ýaqytta turmystyq kómek kórsetý qyzmeti otbasynyń sıfrly kartasy avtomattandyrylyp, ári qaraı «E-Shańyraq» aqparattyq júıesine engiziletin bolady.
– Turmystyq qor men halyqtyń kommýnaldyq shyǵyndaryn baqylaıtyn úderisterdiń ashyqtyǵyn qamtamasyz etý úshin biz TKSh-nyń tabıǵı monopolııalar, basqarýshy jáne servıstik kompanııalar sııaqty barlyq sýbektilerin «E-Shańyraq» dep atalatyn biryńǵaı sıfrly ekojúıege qosamyz, – dedi S.Jalqul.
Elimizdiń ózge aımaqtaryndaǵy elektr qýatyn tutynýshylar jańa tarıfke 2023 jyldan kóshe bastaıdy.
Kezdesý barysynda jumys tobynyń músheleri kópshilik tarapynan qoıylǵan saýaldarǵa jaýap berdi. Jıyn sońynda jańa tarıf engizilmes buryn óńirdegi shaǵyn jáne orta bıznes nysandaryna ózderi óndiretin taýarlar men kórsetetin qyzmetteriniń qunyn tómendetý jóninde túsindirý jumystaryn júrgizý qajet ekeni aıtyldy.
Qostanaı oblysy
