Basqosýda alǵashqy bolyp sóz alǵan ýnıversıtet rektory Erlan Sydyqov zaman aǵymyna saı til únemi damıtynyn atap ótti. «Til – tiri organızm, ony damytý kerek. Qazaq tili – álemdegi eń baı tilderdiń biri. Tildiń damýymen tarıhı ózindik sana men rýhanı oı da alǵa basady. Ýaqyt óte kele qazaq tili álem tilderiniń birine aınalady dep úmittenemin», dedi akademık.
Al professor Sherýbaı Qurmanbaıulynyń pikirinshe, qazaq tiliniń leksıkalyq qorynda 361 myń termın qoldanylady. Ol termınologııalyq qordyń leksıkalyq qordan eki ese kóp ekenine nazar aýdardy. «Ǵalymdardyń aıtýynsha, bizdiń tilimizge engizilgen jańa sózderdiń 82 paıyzyn termınder quraıdy», dedi belgili ǵalym. Osy rette professor Anar Salqynbaı sózjasam ǵylymyn zertteý qajettigin aıta kelip: «Qazaq tilin damytý úshin sózjasam ǵylymyn zertteý kerek. Bul salany keńes kezeńinde zertteýge ruqsat etilmedi. Eger túrki halyqtary sózjasam ǵylymyn zertteýdi 40-50-jyldary bastaǵan bolsa, bizdiń ǵalymdar olardan 40 jylǵa artta qaldy», dedi.
Jıyn barysynda Z.Bazarbaeva, E.Qajybek, K.Qurmanálıev, J.Baltabaeva, B.Qasym, B.Momynova, J.Súleımenova, T.Ermekova, Q.Esenova sekildi elimizge tanymal ǵalymdar til biliminiń qazirgi jaǵdaıy men qazaq tilindegi sózjasam týraly zertteýlerdiń baǵyttaryna tereńirek toqtalyp, baıypty baıandama jasady. Sonymen qatar ǵylymı is-shara aıasynda «Til ǵylymy zertteýlerin úılestirý ortalyǵy» atty qoǵamdyq uıym quryldy. Uıymnyń negizgi maqsaty – lıngvıstıka men fılologııa salasy boıynsha elimizdegi doktorlyq dıssertasııalyq keńesterge usynylatyn jumystardyń qaıtalanbaýyn, sala boıynsha basym baǵyttardy zerttep, dıssertasııalyq taqyryptar tańdaýdy úılestirýdi kózdeıdi. Bul jumystar akademık Shora Sarybaevtyń konsepsııasyn negizge alyp jasalady.
Sondaı-aq konferensııada Ulttyq ǵylym akademııasynyń akademıgi Kárimbek Qurmanálıevtiń «Qazaq tilindegi sózjasamdyq uıa: teorııa jáne praktıka» kitaby tanystyryldy. Bul ǵylymı eńbekte tilimizdegi túrli sózjasam tásilderi arqyly jasalǵan sózderdiń bári týyndy sózderge jatatyndyǵy aıtylyp, týyndy sóz termıniniń máni ashylǵan.
Jıyn sońynda ýnıversıtet rektory, UǴA akademıgi Erlan Sydyqov mereıtoı ıesine Ulttyq ǵylym akademııasynyń «Qurmet gramotasy» men atalǵan oqý ornynyń «Kúltegin» medalin tapsyrdy.
