Eýrazııalyq ekonomıkalyq odaq 2050 jyly yqpaldy birlestikke aınalady

ASTANA. 28 sáýir. Memleket basshysy Nursultan Nazarbaev M.Lomonosov atyndaǵy Máskeý memlekettik ýnıversıtetinde eýrazııalyq ıntegrasııa taqyryby boıynsha júrgizgen dárisinde Eýrazııalyq ekonomıkalyq odaqty 2050 jylǵa deıin álemdegi ıntegrasııalyq birlestikterdiń aldyńǵy úshtigine engizý qajettigin aıtty. Bul týraly «QazAqparat» agenttigi habarlady. Dáris barysynda Memleket basshysy: «Eýrazııalyq ekonomıkalyq odaq aıasyndaǵy bizdiń áriptesterge 2050 jylǵa qaraı álemniń 300 birlestiginiń ishinde eń myqty ıntegrasııalyq uıymdardyń úshtigine ený maqsatyn qoıýdy usynamyn. Qazirdiń ózinde men mundaı yqpaldastyqtyń tek úsh-tórteýin kórip otyrmyn. Bizge de nege talpynbasqa? Reseı ekonomıkasynyń róli óte mańyzdy. Sondyqtan bizdiń birlestiktiń damýy ekonomıkalyq pragmatızm, jaýapkershilik, evolıýsııalyq, ashyqtyq sheńberinde júrgizilýi tıis», – dedi. Budan keıin Nursultan Nazarbaev sózin saptaı kele, áriptesterine Qazaqstannan úlgi alýdy usyndy. «Qazaqstanda 2050 jylǵa deıingi jańa strategııalyq baǵdarlama iske asyrylýda. Onyń aldynda bizde 2030 jylǵa deıingi baǵdarlama merziminen buryn júzege asty. Endi biz ǵasyrdyń ortasynda álemniń damyǵan 30 eli qataryna qosylýdy maqsat etip otyrmyz. Bul arman-qııal emes. Bul baǵdarlama tolyǵymen qarjymen, mamandarmen jáne jobalarmen qamtamasyz etiledi. Biz osy maqsatqa táýelsiz, Eýrazııalyq ekonomıkalyq keńistiktiń tolyqqandy múshesi retinde qol jetkizýdi kózdep otyrmyz. Bizdiń barlyǵymyz aldymyzǵa osyndaı joǵary maqsattardy qoıýymyz kerek», – dedi Nursultan Nazarbaev. Joldybaı Bazar. Derekkóz: «QazAqparat». Foto: Liter.kz.