Usaq torapty CKD-ádisimen qurastyrylǵan avtokólik dońǵalaǵynyń dıskisi men balony Pavlodarda jasalǵan. Qýattandyrǵyshy da – otandyq ónim. «Allıýr» zaýytynyń lokalızasııalyq óndiris bóliminiń bastyǵy Ádil Shaıkemelovtiń aıtýynsha, Qazaqstanda jasalǵan árbir avtobólshek shamaly bolsa da óndiristiń jergilikti úlesin arttyra túsedi. Mysaly, búginde Kia Sportage kóliginiń jergilikti úlesi 35% shamasynda. Aldaǵy ýaqytta kóliktiń shanaǵyn dánekerleý, boıaý jumystary da osy zaýytta atqarylmaq. Bul mejege qol jetse, koreılik avtokóliktiń jergilikti úlesi 45%-dyń ústine shyǵady.
Zaýyt bıyldyń ózinde 32 myń avtokólik qurastyryp shyǵarǵan. Jyl aıaǵyna deıin 70 myń avtokólik shyǵarý josparlanyp otyr.
– Qostanaıda qurastyrylyp jatqan avtomobılderdi tek Qazaqstanda ǵana emes, birqatar shet memleketterden kezdestire alasyz. Osy oraıda «SaryarqaAvtoProm» jaýapkershiligi shekteýli seriktestiginiń asa tabysty kommersııalyq joba ekenin aıta ketken jón, – dedi «Allıýr» zaýyty dırektorynyń keńesshisi Sergeı Mogılatov.
Búginde zaýytta Kia Sportage krossoverinen bólek, usaq torapty qurastyrý ádisimen jasalǵan LADA Granta avtokóligi de shyǵady. Jyl sońyna qaraı bul eki avtokóliktiń shanaqtaryn dánekerleý, boıaý jelilerin iske qosý josparlanyp otyr.
Qostanaı oblysy
