Tatarstannan kelgen qonaqtardyń ishinde «Qostanaı jáne Qostanaı oblysy tatarlarynyń tarıhy» kitabyn jazyp shyqqan qalamger Zýfar Mahmutov aqsaqal da bar. Mereke barysynda avtor tatar tarıhyna qatysty qyzyqty málimettermen bólisip, oblystyq etnobirlestikterdiń basshylaryna bir-bir kitap tartý etti.
– Sabantoı – túrki tildes halyqtardyń egis naýqanynan keıin bas qosyp, toı-dýman quratyn eńbek merekesi. Bul mereke astyqty aımaq – Qostanaı oblysy úshin de mańyzdy. Elimizde dostyq pen birlikti aıǵaqtaıtyn ataýly kúnder az emes. Sonyń biri osy – sabantoı. Qostanaı oblysyndaǵy etnobirlestikke múshe tatar-bashqurt ulty ókilderiniń ishinde aımaqtyń áleýmettik-ekonomıkalyq damýyna barynsha úles qosyp júrgen dıqan sharýalar da barshylyq, – deıdi oblystyq assambleıa janyndaǵy «Dýslyq» tatar-bashqurt etnomádenı birlestiginiń basshysy Rınat Bektemirov.
Merekelik baǵdarlama aıasynda kópshilik qol kúresi, gir kóterý, aırannyń ishinen teńge alyp shyǵý, kóz jumǵan qalpy taıaq laqtyryp, nysanadaǵy qutyny qulatý sııaqty halyq oıyndaryn tamashalady. Ásirese, tatar halqynyń belbeý kúresin qyzyqtaýshylar kóp jınaldy. Tartysty básekede aýyr salmaqtaǵy qostanaılyq palýan Talǵat Jıentaev pen Myltyqbaı Ábdýaıtovtyń baǵy jandy. Jarysty uıymdastyrýshylar jeńimpazdardyń ıyǵyna bir-bir qoıdan óńgerip berdi.
Sabantoıdyń sánin kirgizip, mánin asha túsken ulttyq oıyndardan keıin merekege jınalǵan jurt «Dýslyq» ulttyq ortalyǵynyń ókilderi pisirgen salmaǵy 25 kılo bolatyn tátti chak-chaktan aýyz tıdi.
Qostanaı oblysy
