Sport • 11 Shilde, 2022

Úmitker anyqtaldy

242 ret

kórsetildi

3 mın

oqý úshin

Ispanııanyń astanasy – Madrıdte úmitkerler týrnıri óz máresine jetti. Atalǵan jarysta jer jahannyń eń úzdik segiz shahmatshysy sheberlik baıqasty. 20 táýlik boıy sharshy taqtaǵa úńilgen oıynshylar kelesi jyly kimniń álem chempıony ataǵy úshin talasýǵa laıyq ekenin anyqtady.

Ǵalym SÚLEIMEN

Pıreneı túbegindegi týrnır Iаn Nepomnıashııdiń jeńisimen aıaqtaldy. Reseı shahmatshysy 14 kezdesýdiń beseýinde jeńiske jetip, toǵyzynda teń tústi. Nátıjesinde, 9,5 upaı jıyp, jarys jeńimpazy atandy. Osylaısha, Brıansk qalasynyń týmasy óziniń týǵan kúnine tamasha syılyq jasady. 14 shildede Iаn 32 jasqa tolǵaly otyr.

Ekinshi oryndy Dın Lıjen ıelendi. 29 jastaǵy Qytaıdyń saıypqyrany 8 upaıdy óz qorjynyna saldy. Ol tórt oıynda basymdyq tanytqanymen, eki retinde ese jiberdi. Qalǵan partııalardy teń aıaqtady. Úshinshi satyǵa Teımýr Radjabov taban tiredi. 35 jastaǵy Ázerbaıjannyń maqtanyshy 7,5 upaıdy enshiledi. Dál sondaı upaı jıǵan amerıkalyq Hıkarý Nakamýra tórtinshi oryndy qanaǵat tutty. Al odan keıingi satylarǵa amerıkalyq Fabıano Karýana (6,5 upaı), fransııalyq Álıreza Fırýzdja (6 upaı), polshalyq Iаn-Kshıshtof Dýda (5,5 upaı) jáne majarstandyq Rıhard Rapport (5,5 upaı) jaıǵasty.

Týrnırdiń jeńimpazy 48 myń evro kóleminde syıaqy alsa, ekinshi oryndy ıelengen oıynshynyń esepshotyna 36 myń aýdaryldy. Úshinshi satyǵa taban tiregen sańlaqqa 24 myń tıesili. Sonymen qatar oljalaǵan árbir jarty upaı úshin qatysýshylarǵa 3 555-ten tabys etildi. Al jarystyń jalpy júlde qory 500 myń evrony qurady.

Úmitkerler týrnırinde top jarǵan Iаn Nepomnıashıı kelesi jyly 16-shy álem chempıony Magnýs Karlsenmen kezdesedi. Novegııanyń týmasy da 32 jasta. Ol 2013 jyly Úndistannyń Chennaı qalasynda jergilikti oıynshy Vıshvanatan Anandty 6,5:3,5 esebimen utyp, altyn tájdi ıelendi. Odan keıingi jyldary taǵy sol Anand (6,5:4,5), reseılik Sergeı Karıakın (6:6, taı-breık 3:1), amerıkalyq Fabıana Karýana (6:6, taı-breık 3:0) jáne Iаn Nepomnıashııdi (7,5:3,5) utyp, óz ataǵyn sátti qorǵady. Iаǵnı sońǵy toǵyz jyl aralyǵynda Karlsendi eshkim tuǵyrdan taıdyra alǵan joq.

Santonıa saraıynda ótken jarystyń uıymdastyrylý deńgeıi óte joǵary bolǵanymen, kóptegen maıtalman maman men osy sport túriniń shynaıy jankúıeri úmitkerlerdiń ónerine múlde kóńilderi tolmaǵandaryn ashyq aıtty. Osy oraıda Vladımır Kramnık, Magnýs Karlsen, Sergeı Karıakın bastaǵan bir top ataqty shahmatshylar Madrıdtegi týrnırge qatysýshylardyń oıynyn synǵa alǵanyn da aıta ketýge tıispiz.