Prezıdenttiń armııanyń jaýyngerlik ázirligin arttyrý jónindegi tapsyrmasyn iske asyrý sheńberinde áskerı bólimderdi jartyjyldyq sıkl boıynsha daıarlaý ótip jatyr.
Jańa tártip áskerlerdi daıarlaý qarqyndylyǵyn arttyrýǵa, bólimsheler jeke quramynyń, olardyń komandırleri men basqarý organdarynyń oqytý deńgeıin arttyrýǵa múmkindik beredi. Sonymen qatar, oqý-materıaldyq bazany utymdy paıdalanýǵa, oq-dáriler men motoresýrstardy tutynýdyń únemdi tetikterin engizýge baǵyttalǵan jańa tásilder qalyptasýda.
Odan bólek, áskerı qyzmetshiler bólimshelerdi (eseptoptardy, ekıpajdardy) daıarlaý barysynda qazirgi jalpyáskerı urystar jyldam ózgeretin jaǵdaıda jaýyngerlik tapsyrmalardy oryndaýdy úırenedi. Oqý-jaýyngerlik tapsyrmalardyń maqsatqa saı oryndalýy jeke quramnyń jumylyp áreket etýine, bir-birin uǵynýyna baılanysty.
Bir aı boıy áskerı qyzmetshiler bólimsheler quramynda atystan, taktıkalyq, arnaıy daıarlyqtan jáne basqa da pánderden normatıvterdi pysyqtaıdy. Bunyń bári dalalyq jaǵdaıda toptyq, taktıkalyq tapsyrmalardy oryndaýdaǵy is-qımyl mashyǵyn meńgerýge yqpal etedi. Jeke quram men bólimsheniń daıyndyq deńgeıi osylardy oryndaý sapasyna qaraı aıqyndalatyn bolady.
Bólimshelerdiń, eseptoptardyń jáne ekıpajdardyń úılesimdi is-qımylynyń sońy bólimsheler quramynda jaýyngerlik atysty oryndaýmen aıaqtalady.
