Eýrazııalyq ıntegrasııa halyqtardyń rýhanı baılanystaryn tereńdete túsedi

ASTANA. 29 sáýir. M.V.Lomonosov atyndaǵy Máskeý memlekettik ýnıversıtetinde oqyǵan dárisi kezinde Prezıdent Nursultan Nazarbaev ekonomıkalyq ıntegrasııanyń halyqtar arasyndaǵy dostyq pen mádenı-rýhanı baılanystardy odan ári damytatynyna toqtaldy. Bul týraly egemen.kz tilshisi habarlady. Mádenı baılanystar men tereń dostyq qarym-qatynastardyń ekonomıkaǵa tıgizetin jaqsy áserin, oń yqpalyn sóz etken  Nursultan Nazarbaev:  «HHI ǵasyr mádenı segmentti ishki jalpy ónimniń ósýinde qomaqty paıyzdar ákeletin ulttyq ekonomıkalardyń sózsiz mańyzdy quramdas bóligine aınaldyrady. Bul – týrızm, sonyń ishinde tarıhı-mádenı, ekologııalyq jáne medısınalyq týrızm. Bul – ınnovasııalyq-ındýstrııalyq damý men basqarý júıesi úshin aıryqsha mańyzdy bilim berý qyzmetteri. Bul – ekonomıkanyń kóńil kóterý, sport sektor jáne aqparattyq ónim óndirisi. Sonymen birge, mádenı-gýmanıtarlyq ıntegrasııa úderisiniń qandaı da bir segmenttiń ústemdiginen eýrazııalyq keńistiktegi rýhanı-mádenı alýandylyqty joıyp jibermeýi de mańyzdy», – dedi. Nursultan Nazarbaev dáris barysynda ulttyq mádenıetterge qurmetpen qaraý kerektigine de nazar aýdardy. Ol: «Men bizdiń kez kelgen elimizde mádenıettiń ulttyq mazmunynyń erozııasyna jol berýge bolmaıdy dep esepteımin. Sondyqtan múshe memleketterdiń mektepteri men joǵarǵy oqý oryndarynda bir-birimizdiń tarıhymyzdy, ádebıetimizdi mádenı muralar men tildi oqyp-úırenýdi yntalandyrýdyń mańyzy zor», dedi. Buǵan qosa, Memleket basshysy keleshekte paıda bolýy yqtımal eýrazııalyq habar taratý qurylymdary ıntegrasııalyq úderiske qatysatyn barlyq elderdiń memlekettik tilderin qoldanǵany mańyzdy dep esepteıtinin aıtty. Joldybaı Bazar. Derekkóz: egemen.kz. Foto: Astana-akshamy.kz.