Al qazir... Baýyr basyp kettik. Jańa qosylǵan oblystyń jaqsysyn úırendik, tanystyq, tabystyq.
Endi, mine, týǵan oblysymyz qaıta oraldy. Qazaq halqynyń «Týǵanyn tapty» deıtinindeı, bórkimizdi aspanǵa ata qýandyq. Qýanbaǵanda she?! Oblysymyz jańaryp oraldy, jańǵyryp oraldy. Danyshpan aqyn, uly aqyn Abaıdyń atyn alyp oraldy. Abyroıdy asqaqtata keldi. О́z aýdandary, qalalary túp-túgel qaıta keldi, qaıtyp keldi. «Sý ishken qudyǵyńa túkirme» degendeı, Shyǵys Qazaqstanǵa da qaraılaı beredi ekenbiz. Uly aqyn Abaıdy jeńgeleri «Telqara» dep ataǵandaı, biz de eki oblysqa qanatymyzdy qatar jaıyp, qımastyq sezimmen qol sermep ketip qala almaıtyndaımyz.
Ándegideı «Qımaı ketip baramyz», biraq syımaı ketpedik. Keńistigimizdi, keregemizdi keńeıtip bara jatyrmyz. Kóptegen janmen tanystyq, jýrnalıspen dostastyq.
Bizge bári ortaq. Qazaqstan ortaq, el ortaq, jer ortaq. Eki oblystyń basylymdary da, baspasózi de ortaq.
Egizdeı bolǵan qos oblys qatar damyp, qaryshtap attap, Qazaqstandy órkendete, kórkeıte bersin! Qalamyz da, dalamyz da jaınaı bersin! Jasara bersin! Jańarǵan Qazaqstannyń, jasarǵan Qazaqstannyń áleýeti, qýaty artyp, kúsheıe bersin.
Abaı oblystyq máslıhatynyń hatshylyǵyna «Shalabaı» JShS-nyń dırektory, qazaqtyń aqbas sıyry tuqymyn ósirip, elimizdiń damýyna eleýli úles qosyp júrgen jerlesimiz Qýanysh Súleımenovtiń saılanǵanyn da aıta keteıik.
Jumabaqyt RAHMETOVA,
ardager ustaz
Abaı oblysy,
Jarma aýdany
