Oqıǵa 13 shilde kúni, Prırechensk aýylyndaǵy ózen jaǵasynda oryn alǵan.
«Qarmaǵyma balyq ilinbegendikten, jınalyp úıge qaıtqaly jatqanmyn. Sol sátte jaǵadan on metrdeı jerde sýda eki balany kórdim. Men olarǵa ún qatyp, qol bulǵadym, jaýap bermedi. Ekinshi ret aıqaılasam da únsiz. Sol kezde balalardyń sý jutyp qoıǵanyn túsindim. Sýǵa súńgip, balalarǵa qaraı júzdim. Júzip bara jatyp úshinshi balany kórdim. Aldymen bireýin, sosyn ekinshisin jaǵaǵa shyǵardym. Osy kezde kózimniń qıyǵymen úshinshisin kórip turdym. Ol sýdyń astyna ketti. Men onyń sońynan súńgip kettim. Sol sátte bala sýdyń túbine batyp ketken eken. Ony jaǵaǵa shyǵaryp, medısınalyq alǵashqy kómek kórsete bastadym», dep baıandaıdy Andreı.
Búgingi kún batyrynyń aıtýynsha, birinshi qutqarylǵan eki bala tez esin jıyp, ózine kelgen. Al úshinshi jasóspirim múldem tynystamaǵan.
«Men ár sekýndtyń mańyzdy ekenin túsindim, sondyqtan balalardy qutqarý úshin qolymnan kelgenniń bárin jasadym. Sońǵysyna jasandy tynys jasap, júrek tusyn ýqaladym. Bir búıirine aýdaryp, arqasynan qaǵa bastadym. Sol kezde balanyń ókpesindegi sý shyǵyp, dem ala bastady. Men sol sátte ǵana ózimdegi úlken jeńildikti sezindim! Eki qolym qobaljyǵannan dirildep ketti», dedi er azamat.
Aıta keteıik, kóp uzamaı jedel járdem qyzmetkerleri kelip, balalardy aýrýhanaǵa jetkizgen. Qazir olardyń densaýlyǵyna qaýip tónip turǵan joq. Dárigerler aýyl turǵynynyń der kezinde jáne saýatty áreketiniń arqasynda ǵana balalar aman qalǵanyn aıtty. Belgili bolǵandaı, qutqarylǵan ul balalar bir úıdiń perzenti. Ekeýi jeti jasar egizder, al úlken aǵasy toǵyz jasta.
Ata-anasynyń aıtýynsha, aǵaıyndylar eshqashan úlkendersiz ózenge barmaǵan. Olar bul joly ózderinen jasy úlkendeý dostarymen barǵanyn aıtypty. Júgirip kele jatqan aǵaıyndylardyń biri sýǵa qulap qalady. Ony aǵys alyp kete bastaǵan kezde, egizder oǵan kómektesý úshin sýǵa túsken eken.
