Qarjy mınıstrliginiń málimetinshe, kezdesýge Almaty oblysynyń ákimi Marat Sultanǵazıev pen Balqash aýdanynyń ákimi Ǵalym Toqpeıisov qatysty. Basty nazarda jańa jumys oryndaryn qurý, nesıe berý arqyly shaǵyn jáne orta bıznes sýbektilerin memlekettik qoldaý sharalary, sondaı-aq halyqtyń tabysyn arttyrý baǵdarlamasy jáne basqa da máseleler boldy.
Atap aıtqanda, osy jyldyń 6 aıynda óńdeý ónerkásibiniń kólemi tıisinshe 5,8, jalpy ishki ónim 3,4, qurylys 9,2, saýda men kólik salalary 6,2 paıyzǵa ulǵaıdy. Bıyl óńirlerdiń damýyna respýblıkalyq bıýdjetten 5,5 trln teńge bólindi. Bul jalpy shyǵyndardyń 30 paıyzyn quraıdy.
Qazirgi ýaqytta jergilikti bıýdjetterdiń kiris bazasy nyǵaıtylýda. Bul rette, shaǵyn jáne orta bıznesten túsetin korporatıvtik tabys salyǵyn jergilikti deńgeıge berý oń áser etedi. «Aýyl – El besigi» jobasyn iske asyrýǵa 128 mlrd teńge bólindi. Olar 580 aýylda 1 100 jobany iske asyrýǵa baǵyttalǵan.
Sondaı-aq «Dıplommen aýylǵa» baǵdarlamasyn iske asyrý aıasynda 4,3 myń mamanǵa turǵyn úı satyp alý úshin bıýdjettik kredıtter berýge 20 mlrd teńge bólindi. Osy keshendi josparlar aýqymynda 170 myńnan astam jumys orny ashylady.
«Memleket basshysynyń «Jańa Qazaqstan» tujyrymdamasy adal básekelestikti kúsheıtý, jeke menshikti qorǵaý, ekonomıkany monopolııadan aryltý arqyly elimizdiń jańa ekonomıkalyq baǵytyn iske asyrýǵa baǵyttalǵan. Osy sharalardyń barlyǵy saıası turaqtylyqty, bıznestiń múddeleri men quqyqtaryn qorǵaý júıesin aıtarlyqtaı nyǵaıtady, barlyq qazaqstandyqtar úshin keń ekonomıkalyq múmkindikter týǵyzady», dep atap ótti Erulan Jamaýbaev.
