Qazaqstandyq joǵary oqý oryndarynda ekologııa jáne qorshaǵan orta salasyndaǵy bilim berý baǵdarlamasynyń mazmunyn jetildirýge arnalǵan jobada pedagogıkalyq sheberlikti arttyrý, ekologııa jáne qorshaǵan orta salasyndaǵy saraptamalyq bilimdi damytý qarastyrylyp otyr. Oǵan jergilikti oqý orny mamandarymen qatar Qazaq ulttyq agrarlyq zertteý ýnıversıteti, I.Jansúgirov atyndaǵy Jetisý ýnıversıteti, Q.A.Iаsaýı atyndaǵy halyqaralyq qazaq-túrik ýnıversıteti, S.Seıfýllın atyndaǵy Qazaq agrotehnıkalyq ýnıversıteti, M.H.Dýlatı atyndaǵy Taraz ýnıversıteti jáne Q.Jubanov atyndaǵy Aqtóbe óńirlik ýnıversıteti, A.Baraev atyndaǵy astyq sharýashylyǵy ǵylymı-óndiristik ortalyǵynyń jas ǵalymdary qatysty.
Qorshaǵan ortanyń ahýalyn bilý úshin jasalǵan jumystar barysynda ár 25 metr saıyn ósimdiktiń túrlerine zertteý jasalyp, sol aýmaqtaǵy kólemi anyqtaldy. Jas ǵalymdarǵa AQSh-taǵy irgeli oqý oryndary professorlary, Qazaq ulttyq agrarlyq zertteý ýnıversıtetindegi turaqty eginshilik ortalyǵy mamandary oflaın jáne onlaın formatta dáris oqydy.
– Bul – negizinen aımaqtyq ýnıversıtetterge arnalǵan joba. Qazirgi ýaqytta NASA-men birlesip ǵylymı joba daıyndap, Aral teńizi tartylýynyń álemdik klımatqa áserin zertteý ústindemin. Sondaı-aq semınar barysynda qazaqstandyq jáne amerıkalyq bilim berý baǵdarlamalaryn salystyryp taldaý jasadyq, – deıdi professor Djıhýan Chen.
Amerıkalyq mamannyń aıtýynsha, jas zertteýshilerdiń NASA ǵaryshtyq agenttiginiń Qazaqstandaǵy jáne Ortalyq Azııadaǵy jobalaryna qatysýǵa múmkindikteri bar.
Qoja Ahmet Iаsaýı atyndaǵy halyqaralyq qazaq-túrik ýnıversıtetiniń oqytýshysy Abylaıhan Ázimbaı – vorkshop barysynda mazmundy aqparatpen, jańa qurylǵylarmen tanysqan jas mamannyń biri. Ol úshin ǵalamdyq ózgerister men jerdi baqylaý ortalyǵynyń professory Fen Peıleıdiń jetekshiligimen dalalyq jumystar aıasynda ósimdik quramy men sapasy jaıly júrgizilgen zertteýler, jańa qurylǵylar arqyly aýanyń ylǵaldylyǵyn, sýdyń mólsherin anyqtaý qatty qyzyqtyrypty. Ol professor Djıhýan Chenniń «Bıofızıkalyq modelder jáne olardy ekojúıelik taldaýda qoldaný» atty oqý quralynyń osy sala mamandaryna bereri mol ekenin aıtady.
M.H.Dýlatı atyndaǵy Taraz ýnıversıteti «Ekologııa» kafedrasynyń meńgerýshisi, PhD doktory Elmıra Madalıeva sheteldik oqytýshylar bilim berýdiń jańa tásilderin úıretkenin jetkizdi.
Qyzylorda
