Atalǵan qanatqaqty joba arqyly 2022 jyly múgedektikti belgileý boıynsha syrttaı qyzmet kórsetýdi 20%-ǵa deıin jetkizý josparlanǵan. Qazirgi ýaqytta bul kórsetkish 21,6%-dy quraıdy.
Buǵan deıin habarlanǵandaı, Ulttyq qoǵamdyq senim keńesiniń VI otyrysynda Memleket basshysy erekshe qajettilikteri bar adamdar úshin barynsha qolaıly jaǵdaı jasaýdy, olardy qaǵazbastylyqtan aryltýdy, ınstansııalar boıynsha júrýin jáne qyzmet kórsetýshilerdiń qyzmet alýshylarmen baılanysyn boldyrmaýdy tapsyrdy. Osy tapsyrmany oryndaý maqsatynda Eńbek jáne halyqty áleýmettik qorǵaý mınıstrligi Densaýlyq saqtaý, sondaı-aq Sıfrlyq damý, ınnovasııalar jáne aeroǵarysh ónerkásibi mınıstrlikterimen birlesip, Qazaqstannyń barlyq 20 óńirinde medısınalyq-áleýmettik saraptama (MÁS) júrgizýdiń syrttaı formaty boıynsha jobany qolǵa aldy.
Múgedektik tobyn anyqtaý boıynsha qyzmet alý úshin ótinish berýshi tek turǵylyqty jeri boıynsha emhanaǵa baryp, qajetti tekserýden ótýi qajet. Qalǵan prosester aqparattyq júıelerdi ıntegrasııalaý esebinen ótinish berýshiniń qatysýynsyz ótedi. Jalpy, syrttaı kýálandyrýǵa kóshý ákimshilik jáne bıýrokratııalyq kedergilerdi joıady, MÁS saraptamalyq sheshimderiniń ashyqtyǵyn qamtamasyz etedi, úıden shyqpaı-aq múgedektikti belgileý jáne múgedektigi bar adamdardy áleýmettik qorǵaý sharalaryn aıqyndaý boıynsha qyzmetter alýǵa múmkindik beredi. Osylaısha, bul qadamdar sybaılas jemqorlyq táýekelderin barynsha azaıýyna yqpal etedi.
