Astanalyqtar áýezdi án tyńdap, ónerden estetıkalyq lázzat alý úshin kóbinese E.Rahmadıev atyndaǵy Memlekettik akademııalyq fılarmonııaǵa baryp jatady. Ásirese, fılarmonııa solısi Saıda Qalyqovanyń kórermeni kóp desedi. Álqıssa. Mýzykant, sazger Saıda Qalyqova atalǵan óner ujymynda kópten beri eńbek etedi. «Bolashaq» halyqaralyq baǵdarlamasymen oqyǵan ol Florensııa (Italııa) qalasyndaǵy Conservatorio Luigi Cherubini ýnıversıtetinde magıstratýrany úzdik dıplommen támamdaǵan. Sondaı-aq D.D.Shostakovıch atyndaǵy Sankt-Peterbýrg qalasyndaǵy akademııalyq fılarmonııasynyń da beldi ónerpazy. Saıda tyńdaýshysyn óziniń erekshe talantymen hám fortepıano aspabynda asqan oryndaýshylyq sheberligimen tańqaldyryp, «Qazaqstannyń 100 jańa esimi» jobasyna endi. Zaǵıp sazgerdiń talaby men talantyna kóz aldyndaǵy tas túnek eshqashan kedergi bolǵan emes.
«Men bala kezimnen mýzykaǵa áýespin. Alty jasymda ata-anama eshteńe aıtpastan, óz betimmen mýzyka pedagogyna jazyldym. Aýyr derttiń saldarynan qos janarym kórýden qalsa da, mýzykamen aınalysýdy jalǵastyrdym. Notany kózben emes, júrekpen jattadym. Áýen men áýez – meniń ómirim. Sonyń arqasynda jańa belesterdi baǵyndyryp, túrli konserttik alańdarda óner kórsetip júrmin», deıdi Saıda Qalyqova.
Ol alǵashqy shyǵarmasyn 15 jasynda jazǵan. «Jańbyrdan keıin» kompozısııasy aq jaýynnan keıingi tabıǵattyń tamashasyn ándetedi.
Aıta keteıik, búginde sazger 20-ǵa jýyq mýzykalyq shyǵarmalardyń avtory, 100-den astam klassıkalyq mýzykanyń úzdik shyǵarmalaryn jatqa oryndaıdy. Qazaqstanda ǵana emes, Reseıde, Italııada, Túrkııa men Rýmynııada ondaǵan konsert ótkizdi.
Odan bólek Saıda Qalyqova halyqaralyq baıqaýlarǵa qatysyp, qaıyrymdylyq is-sharalaryna da jıi atsalysady. Al shyǵarmashylyqta repertýaryn únemi jańartyp otyrýǵa tyrysady.
Eske salsaq, mýzykanttyń elordalyq memlekettik fılarmonııa sahnasynda shyǵarmashylyq jolynyń jıyrma jyldyǵyna arnalǵan konserti ótti. Endigi maqsat – Londondaǵy Albert-holl, Monakodaǵy fılarmonııa sahnasy. Talantty sazgerdiń armanyna tilekshimiz.
