Kedendegi kólik keptelisi elektrondy kezek arqyly retteledi

Qytaı Halyq Respýblıkasy basqa elderden kiretin júk kólikteriniń sanyn ulǵaıtýyna baılanysty keden beketinde kepte­lis paıda bolǵan. «Dostyq» beketine qaraı qazaq­stan­dyq­tar­dan bólek, Reseı jáne Belarýs mem­leketterinen de aǵylyp jat­qan kólik kóp.

Osy ýaqytqa deıin shekaradan kúnine 10-15 qana júk kóligi ótse, qazir bul kórsetkish birneshe ese­lengen. Sondyqtan keden be­ke­tine qosymsha mamandar ju­myldyryldy. Sáıkesinshe, ju­mys ýaqyty da tańǵy 8:00-den keshki 20:00-ge deıin uzar­tyl­dy.

«Buǵan deıin keden beketi tańǵy 8:00-den keshki 17:00-ge deıin jumys isteıtin. Jumys ýa­qytyn qosymsha 3 saǵatqa sozdyq. Qujat skanerleýshi jáne tekserýshi mamandardy kóbeıttik. Jalpy sany 31 adam qyzmet etýde. Dúısenbiden bastap taǵy 8 adam qosylady. Qazir shekaradan kúnine 100 júk kóligi ótedi. Ár kólikti tekserý ýaqytyn da jyldamdatyp jatyrmyz», deıdi oblystyq memlekettik kirister departamentiniń basshysy Talǵat Qozybekov.

Keden beketinde qazir 500-deı kólik tur. Olardy mamandar aldaǵy 2-3 kúnde tekserip ótkizbek. Al kezek pen tártip máselesin jergilikti ákimdik, polısııa retteıdi.

«Bizde jedel shtab qurylǵan. Onyń quramynda keden jáne shekara qyzmeti, polısııa bó­li­mi men kólik prokýratýrasy qyzmetkerleri bar. Qa­lyp­tas­qan jaǵdaıǵa baılanys­ty shtab oty­rysyn ótkizdik. Máse­le­ni jan-jaqty talqylap, sheshý joldaryn qarastyrdyq. Kezekti retteý úshin elektrondy júıe qalyp­tasqanǵa deıin esepke alý jáne ońtaılandyrý joldary qaras­tyryldy», deıdi Ala­kól aýda­nynyń ákimi Almas Abdınov.

Jalpy, kólik ótkizý áleýetin arttyrý baǵytynda keden beketin keńeıtý jumystary qolǵa alyndy. Maýsym aıynda qosymsha avtomobıl ótkizý pýnktiniń qurylysy bastaldy. Jobany iske asyrý bir jarym jylǵa jos­par­lanǵan. Onda táýligine ary-beri 1 200-deı kólik tekseri­lip óte­tin bolady.

Esterińizge sala ketsek, buǵan deıin Qorǵastaǵy «Nur joly» ótkizý beketinde de kólik kepte­li­si oryn alǵan edi. Qazir bul bekette elektrondy kezekke qoıý júıesi engizilip, másele sheshimin tapty. Nátıjesinde, qazir kúnine beket arqyly esh kedergisiz 100 shaqty kólik ótedi. Eń bastysy, osy ádis arqyly saladaǵy barlyq deldaldyq jáne alypsatarlyq júıeler tolyǵymen joıyldy.

Jetisý oblysy