Taıaýda shaǵyn qalanyń ortalyǵynda úlken ekran paıda boldy. Turmystyq qaldyqty qoqys jáshiginiń mańaıyna qalaı bolsa-solaı laqtyra salatyn turǵyndardyń ábes áreketi dál sol ýaqytta osy alyp ekranda kórinis taýyp, áshkere bolady. Ár aýladaǵy qoqys alańynyń tusyna arnaıy kameralar ornatylǵan. Bul beınequrylǵylar qoqys jáshiginiń mańaıynda bolyp jatqan qımyl-qozǵalystyń bárin taspaǵa túsirip turady.
Qalany lastaýshylardy áshkerelegish ekran jergilikti ákimdiktiń qarjysyna ornatylypty. Al qorshaǵan ortaǵa janashyr ekobelsendiler ár kameradaǵy vıdeony jınap, shaǵyn beınetúsirilim jasap shyǵarady da, álgi ekran arqyly jalpy jurtqa jarııa etedi. Osylaısha, «qoqys qaharmandary» búkil qala jurtshylyǵyna masqara bolady.
Alaıda keıbir turǵyndar máseleniń munymen sheshile qoıatynyna kúdikpen qaraıdy. О́ıtkeni kommýnaldyq qyzmet kenshiler shaharyndaǵy turmystyq qaldyqtardy syrtqa aptasyna bir-aq ret shyǵarady. Saldarynan qoqys konteınerleriniń mańynda aıaq basatyn jer qalmaı qalady. «Qoqys jáshikteri aýzy-murnynan aqtarylyp tolyp tursa, úıden shyqqan turmystyq qaldyqty jáshiktiń janyna tastamaǵanda, qaıda tastaımyz? Tek qaıtadan úıge alyp kirý ǵana qalady. Biz aqshasyn tólep otyrmyz ǵoı», deıdi jurt.
Al áshkere ekranyna túsip qalǵan bes-alty turǵyn taıaýda ǵana ákimshilik jaýapkershilikke tartylyp, 24 myń teńgeden aıyppul arqalaǵan.
Qostanaı oblysy,
Rýdnyı qalasy
