Memlekettik grant – jańa bıznesti iske qosý jáne damytý maqsatynda óteýsiz berilgen bastapqy kapıtal. Grant kólemi 400 AEK-ti (1 225 200 teńge) quraıdy. Ár qatysýshy ony tek bir ret ala alady. Granttar qarajaty isin jańa bastaǵan kásipkerlerge ózderiniń bıznes-áleýetin ashýǵa, óndiristi jolǵa qoıýǵa jáne damytýǵa, sol arqyly ózin turaqty tabyspen qamtamasyz etýge múmkindik beredi.
О́tinim berý úshin portalda tirkelý, grant alý sharttaryna sáıkestigine tekserýden ótý, bıznes-jospar úlgisin júktep alyp, ony toltyrý jáne portalǵa engizý, sondaı-aq ESQ kiltimen qol qoıý qajet.
Internetke nemese kompıýterge qoljetimdilik bolmaǵan jaǵdaıda, halyqty jumyspen qamtý ortalyqtarynyń ózine-ózi qyzmet kórsetý aımaqtarynda, HQO-da, kásipkerlerge qyzmet kórsetý ortalyqtarynda ótinim berýge bolady.
Grant alý úshin birqatar shartty saqtaý qajet. Jańa bıznes-ıdeıany iske asyrýǵa memlekettik grant alýǵa úmitker bola alatyndar – tirkelgen jumyssyzdar, jeke kásipkerler (tirkeý merzimi 3 jylǵa deıin), biryńǵaı jıyntyq tólemdi tóleýshiler. Bul rette úmitker tómendegi áleýmettik sanattardyń birinen bolý kerek: múgedektigi bar adamdar; qoldanystaǵy «kandas» mártebesi bar adamdar; óńiraralyq qonys aýdarýshylar; az qamtylǵan otbasy músheleri; kópbalaly otbasy múshesi; múgedektigi bar balany tárbıelep otyrǵan adam; asyraýshysynan aıyrylý boıynsha járdemaqy alýshylar; jastar. Úmitkerdiń «Bastaý Bıznes» jobasy boıynsha kásipkerlik negizderine oqytý týraly úsh jyldan aspaıtyn merzimge sertıfıkaty bolýǵa tıis.
Rásimderdiń ashyqtyǵyn qamtamasyz etý, adamı faktordy azaıtý, ótinish berýshilerge yńǵaıly bolý úshin granttar berýdiń búkil prosesi elektrondy formatqa aýystyryldy. Grant alýǵa ótinimderdi qabyldaý biryńǵaı tereze – Business.enbek.kz portaly arqyly júzege asyrylady.
Grantty qajetti qural-saımandardy, eńbek quraldaryn, tehnologııalyq jabdyqtardy, maldy, janýarlardy, qustardy, kóshetterdi, butalardy, tuqymdardy satyp alýǵa, oryn-jaılardy jalǵa alý aqysyn tóleýge alýǵa bolady. Sondaı-aq tutynýshylyq maqsattarǵa, kredıttik qaryzdardy óteýge, jyljymaıtyn turǵyn úı satyp alýǵa jáne salýǵa, jer ýchaskelerin satyp alýǵa, aksızdeletin ónimder óndirýge grant berilmeıdi.
Granttardy halyqty jumyspen qamtý ortalyqtary grant alýǵa úmitkerlerdiń ótinishterin qaraý jónindegi aýdandyq nemese qalalyq komıssııanyń sheshimi negizinde beredi. Úmitkerler óz bıznes-jobasyn komıssııa otyrystarynda tanystyrady. Bul rette komıssııanyń árbir múshesi bıznes-jospardy baǵalaıdy jáne baǵalaý paraǵyn mynadaı ólshemsharttar boıynsha toltyrady: bıznes-ıdeıanyń básekege qabilettiligi, ótkizý naryqtarynyń pysyqtalýy, bıznes-jobanyń qarjylyq ómirsheńdigi, kásipkerlik daǵdylardyń deńgeıi, jańa jumys oryndaryn qurý.
Osylaısha, grant berý týraly sheshim komıssııalyq túrde jáne úmitkerlerdiń bıznes-jobalarynyń pysyqtalýyn baǵalaýdyń naqty ólshemsharttary negizinde qabyldanady. Komıssııa sheshimi úmitkerdiń portaldaǵy jeke kabınetine jiberiledi. Komıssııanyń oń sheshimi bolǵan jaǵdaıda úmitker bank derektemelerin usynady, shartqa qol qoıady jáne odan ári toqsan saıyn qarajattyń paıdalanylýy týraly esep beredi. Munyń bári halyqty jumyspen qamtý ortalyqtaryna barmaı-aq, elektrondy formatta jasalady.
