Túrli apattyń sebebi tehnıkalyq aqaý, kólik tetikteriniń júrip kele jatqanda isten shyǵýy, jol sapasy ǵana emes, ókinishke qaraı, adamı faktordyń áseri de erekshe basymdyqqa ıe. Ishimdik iship kólik júrgizetinder men beıqamdyqqa berilý, ıaǵnı saqtyq sharalaryn umytyp jolda uıyqtap ketý, ózara jarysý nemese keıbir taksı júrgizýshileri arasyndaǵy ózara básekelestik jaǵdaılary joldaǵy qaıǵyly oqıǵalarǵa negiz bolyp tur.
Jýyrda Mańǵystaý oblysynda jol boıynda eki júrgizýshi túsinispeı qalyp, bir-birine qol jumsaýǵa deıin barǵan. Eregis nátıjesinde alǵan soqqylar saldarynan 67 jastaǵy qart júrgizýshi qaıtys bolyp, ekinshi tarap, ıaǵnı jas júrgizýshi jigit quqyq qorǵaýshylardyń qolyna tústi. Osylaısha, eki adamnyń taǵdyry talqan boldy, artynda qaıǵydan zar eńirep otbasylary qaldy.
Jol-kólik oqıǵalaryna sebepshi bolatyn adamı faktordyń biri – minez-qulyqtan týyndaıtyn keleńsiz qylyqtar. Keıbir taksısterdiń jolaýshyǵa talasyp, jolyndaǵyny basyp ozyp, ýaqytpen jarysa júıitkite jónelýiniń sońy talaı qaıǵyly jaǵdaımen aıaqtaldy. Biraq ol qasiretten sabaq alyp, sabaǵa túsip jatqandar shamaly. Muny jolǵa shyqqan jan ońaı ańǵarady. Basyp ozý úshin tar jerde qarsy jolaqqa shyǵý, arnaıy belgilermen tyıym salynǵan tustardy kózge ilmeý, jol boıynda qalǵyp ketý jaǵdaılary jıi kezdesip júr. О́zara básekelestik, qustaı ushyp jarysý, jolaýshyǵa talasý – belsendilik, jaýapkershilik emes, tek qunyǵý ǵana. Árbir júrgizýshi óz moınynda kóligindegi nemese jol ústindegi búkil jolaýshynyń taǵdyry, jaýapkershiligi, obal-saýaby baryn sezinbeıtindeı. Birin-biri jarty jolda qaldyrsam, buryn jetip jolaýshyny aldymen qarmaǵyma ilsem degen ólermendik júrgizýshiler arasynda teketires, eregiske ulasyp, urys-keris, boqtap-balaǵattaý, judyryq ala júgirý syndy óreskel áreketterge ulasady. Buǵan Mańǵystaý oblysynda eki júrgizýshi arasynda oryn bolǵan dálel.
Jol boıynda minez kórsetip, myqtylyqty dáleldeıtin oryn emes, ol barynsha qaýipti keńistik, jol ústinde qandaı jaǵdaıda da sabyr men ustamdylyqqa basymdyq berip, baısaldylyq pen aqylǵa jeńdirip otyrý qajet-aq. Biraq bul – óte qıyn nárse, óziniń erik-jigerin baǵyndyra bilý kez kelgenniń qolynan kele bermeıtin qasıet. Al «jol ústinde jyndy» bolyp júrý – ońaı, ol jeńiltek minez ıelerine tán.
Jol ústine, árbir tasymal máselesine tek tabys dep emes, taǵdyrsheshti sapar dep qaraý kerek. Jol boıynda tártip saqtaýdy júrgizýshiler qashan basty jaýapkershilik etip ustanar eken?!
Mańǵystaý oblysy
