Qazaqstanda medısınalyq saqtandyrý júıesi 2020 jyldan bastap jumys istep keledi. MÁMS-ke tólem jasaý barlyǵy úshin mindetti bolyp sanalatynyna qaramastan, elimizde shamamen 3,1 mln adam áli kúnge deıin saqtandyrylmaǵan. Onyń 3 mıllıony – halyqtyń ekonomıkalyq belsendi bóligi, ıaǵnı jumysqa qabiletti azamattar.
Saqtandyrý aqparattyq júıesinde sońǵy 12 aı ishindegi derekterdi taldaý kezinde MÁMS júıesine qatysýshynyń aldyńǵy mártebesi turǵysynan saqtandyrylmaǵandardyń 69%-y múlde jarna tólemegeni anyqtaldy. Azamattardyń taǵy 16%-y – óz qyzmetin azamattyq-quqyqtyq sıpattaǵy shart boıynsha atqaratyn tulǵalar. Qazir jarnalardy tóleýdi toqtatqan burynǵy jaldamaly jumysshylar 7%-dy quraıdy. Derbes tóleýshilerdiń úlesi – 4%. Qazir jarna tólemeıtin jáne saqtandyrý mártebesin joǵaltqan jeke kásipkerler men biryńǵaı jıyntyq tólem (BJT) tóleýshilerdiń sany 3%-ǵa teń. Bul negizinen 38-40 jastaǵy adamdar. Olar beıresmı jumys isteıdi jáne jarna tólemeıdi. Sondaı-aq jumyspen qamtý ortalyǵyna baryp resmı tirkelýine bolatyn jumyssyzdar da bar. Bul jaǵdaıda osy azamattar jeńildik sanatyna kirip, olar úshin tólemderdi memleket aýdarady», dep túsindirdi ÁMSQ zańdy jáne jeke tulǵalarmen jumys isteý departamenti dırektorynyń orynbasary Janar Botagarına.
Qor jergilikti atqarýshy organdarmen, memlekettik kiris basqarmalarymen, «Atameken» UKP jáne basqa da múddeli mekemelermen birlesip saqtandyrylmaǵan turǵyndardy MÁMS júıesine tartý boıynsha keń aýqymdy aqparattyq-túsindirý jumystaryn júrgizýde.
Buryn saqtandyrý mártebesin jáne MÁMS júıesinde medısınalyq kómek alý úshin pasıenttiń ótken 12 aıǵa jarnasy tólengen bolýy jáne mártebesin joǵaltpaý úshin aı saıyn jarnalardy úzbeı tóleýi mindettelgen edi.
«Tájirıbe kórsetkendeı jáne ótinishterdi taldaý nátıjesinde jumys istemeıtin jáne ózin-ózi jumyspen qamtyǵan azamattardyń ótken kezeń úshin jarna tóleýge qyzyǵýshylyq tanytpaıtyny anyqtaldy. Sol sebepti olar úshin MÁMS júıesine qatysýdyń balamaly nusqasy ázirlendi. Bul saqtandyrý mártebesin alý úshin aldyn ala 12 aıǵa tólem jasaýǵa múmkindik beredi. «Mindetti áleýmettik medısınalyq saqtandyrý týraly» QR Zańyna engizilgen tıisti tolyqtyrýlar men ózgerister 2022 jylǵy shildede bekitildi. Ol qyrkúıek aıynyń basynda kúshine enedi. Bizdiń oıymyzsha, bul halyqty medısınalyq saqtandyrý júıesine kóptep tartýǵa yqpal etedi», dedi Janar Botaǵarına.
Azamattar aldyn ala jarnalardy tólep, jyl boıy MÁMS júıesi boıynsha kórsetiletin medısınalyq kómekti ala alady. Saqtandyrylmaǵan halyqtyń shamamen 30%-y jańa tólem túrin paıdalanady dep kútilýde. Sonymen qatar ótken aılarǵa bereshegi joq derbes tóleýshilerdiń MÁMS jarnalaryn aı saıyn tóleý quqyǵy saqtalady. Esterińizge sala keteıik, 2022 jyly derbes tóleýshiler aı saıyn eń tómengi jalaqy mólsheriniń 5%-y kóleminde – 3 myń teńge jarna tóleıdi.
Eger medısınalyq kómek kórsetý sapasyna qatysty suraqtaryńyz bolsa, siz óz emhanańyzdaǵy pasıentterdi qoldaý qyzmetine júgine alasyz. Eger jaǵdaıdy sol jerde sheshý múmkin bolmasa, Áleýmettik medısınalyq saqtandyrý qoryna ózińizge yńǵaıly baılanys arnalary arqyly habarlasa alasyz: fms.kz resmı saıty, 1406 baılanys ortalyǵy, Qoldau 24/7 mobıldi qosymshasy jáne Telegram-daǵy SaqtandyryBot.
Dál osy quraldar saqtandyrý mártebesin tekserýge múmkindik beredi. Sondaı-aq medısınalyq saqtandyrý júıesindegi óz mártebeńizdi tekserip, QR elektrondy úkimeti egov.kz saıtyndaǵy «Densaýlyq saqtaý» bóliminde «Medısınalyq qyzmetter týraly jáne MÁMS-ǵa aýdarylǵan somalar týraly aqparat» memlekettik qyzmeti arqyly júrgizilgen tólemder týraly bile alasyz.
