Jýyrda atalǵan qujatqa oblys ákimi Ábilqaıyr Sqaqov pen Eýrazııalyq toptyń basqarma tóraǵasy Serik Shahajanov qol qoıdy. Qarajattyń basym bóligi qala ınfraqurylymyn damytýǵa, dene shynyqtyrý-saýyqtyrý nysandarynyń qurylysyna, medısınalyq mekemelerdi qaıta jańǵyrtý men bilim berý salasyndaǵy bastamalardy iske asyrýǵa jumsalady. Máselen 10 kolledj materıaldyq-tehnıkalyq bazasyn nyǵaıtýǵa qarajat alady. Oblystaǵy perınataldyq mekemelerdiń qyzmetkerlerin oqytý uıymdastyrylyp, óńirlik balalar aýrýhanasynyń jańa korpýsynyń jobalyq-smetalyq qujattaryn ázirleý josparlanǵan. Qoldanystaǵy densaýlyq saqtaý mekemeleri jóndeledi.
Memorandýmda áleýmettik jobalardy sıfrlandyrý da qarastyrylǵan. Pavlodar oblysynyń aımaqtyq geoaqparattyq júıesi men avtomattandyrylǵan «112 kezekshi dıspetcher qyzmeti» aqparattyq júıesin ázirleýge qarjy qarastyrylǵan.
Kelisimde aımaqtaǵy ustazdardyń biliktiligin arttyrýǵa sep bolatyn «ERG Mektepke» jáne «ERG kolledjderge» atty baǵdarlamalardy júzege asyrý da qamtylǵan.
– Biz óńirdiń áleýmettik-ekonomıkalyq qýatyn ósirýdi kózdeıtin jumysymyzdy jalǵastyra beremiz. Bul – bizdiń korporatıvtik jaýapkershiligimizdiń negizi ári qyzmetkerlerimiz ben olardyń otbasy músheleriniń ómir sapasyn jaqsartýǵa kúndelikti qosar úlesimiz. ERG kásiporyndary ornalasqan óńirlerde qazaqstandyqtardyń jańa býyny jeke tulǵa retinde úılesimdi ósip, órleýine barynsha yqpal etý kerek, – dedi ERG dırektorlary keńesiniń tóraǵasy Aleksandr Mashkevıch.
Memorandým aıasynda ERG-diń korporatıvtik bastamasy – «Tugan Qala» jobasyn qarjylandyrý kózdelgen. Bul – shahar turǵyndarynyń bastamalary men ıdeıalaryna sarapshylarmen birlese otyryp iske asyrýǵa múmkindik beretin erekshe joba. Úzdik jobalardy turǵyndar daýys berý arqyly ózderi tańdaıdy. Bıyl bul boıynsha 16 joba memorandýmda qamtylǵan. Jalpy bıýdjeti 80 mıllıon teńgeni quraıtyn naqty bastamalar jyl sońyna deıin júzege asyrylýǵa tıis.
Atap óteıik, Eýrazııalyq top kásiporyndary ornalasqan óńirlerge Eurasian Resources Group quıǵan ınvestısııalardyń jalpy kólemi búginde 1 mlrd dollardan asady.
Murat QAPANULY,
jýrnalıst
Pavlodar oblysy
