Baıjan Bıjanov Qyzylorda oblysyndaǵy «Qaraqum» keńsharynyń irgetasyn qalap, búginde úlken aýylǵa aınalýyna eren eńbek sińirgen bilikti basshynyń biri edi. Eldiń atyn er shyǵarady demekshi, dırektor retinde ol aýyldyń yntymaǵyn saqtaýǵa uıytqy bola otyryp, keńshardy oblys, respýblıka kólemindegi aldyńǵy qatarly tabysy tasyǵan rentabeldi sharýashylyqtar qataryna engizdi. Sondaı-aq sharýashylyq birneshe jyl qatarynan aýyspaly «Qyzyl týǵa» ıe boldy jáne ujymnyń joǵary kórsetkishteri úshin KSRO halyq sharýashylyǵy kórmesiniń jeńimpazy retinde búkil Odaqqa tanyldy. О́zi de kóp jylǵy nátıjeli eńbegi úshin «Halyqtar Dostyǵy», «Eńbek Qyzyl Tý» jáne «Qurmet Belgisi» ordenderimen, kóptegen medalmen marapattaldy.
Elge shyndap qyzmet etemin degen adamǵa eshteńe kedergi emestigin Baıjan Bıjanov keńshar dırektory kezindegi eńbegimen aıqyn dáleldedi. Sonaý qıyn-qystaý, eshqandaı tehnıka damymaǵan zamanda aýylǵa jylý júıesin júrgizýdiń ózi nege turady?! Osyndaı elge eńbegi sińgen azamattyń esimin eleýsiz qaldyrýǵa bolmaıdy dep bilemiz. 2017 jyly jergilikti halyq Baıjan Bıjanovtyń 100 jyldyǵy men keńshardyń 60 jyldyǵyn atap ótti. Sol kezde Aral aýdanynyń Abaı eldi mekenindegi №59 orta mektepke Baıjan Bıjanovtyń esimin berý týraly kóterilgen, keıin mektep ujymy, Aral aýdandyq bilim bólimi men onomastıka bólimi maquldap, oń sheshim alǵan bastamanyń áli júzege asar túri kórinbeıdi.
Sheshimniń áli oryndalmaı kele jatqanyna qarap, bir kedergiler kese-kóldeneń tur ma degen de alańdaýshylyq bar. Qysqasy, qandaı jaǵdaı bolsa da tıisti oryndarǵa sheshim tezirek júzege asyrylsa eken degen tilek bildiremiz.
Taǵaı ÁLIEV,
aýyl sharýashylyǵyna eńbek sińirgen zeınetker
Qyzylorda oblysy,
Aral aýdany
