Kezdesý barysynda Abaıdyń «Jıdebaı-Bórili» memlekettik ádebı-memorıaldyq qoryq-mýzeıinde belgili aqyn, Halyqaralyq «Alash» ádebı syılyǵynyń laýreaty, fılologııa ǵylymdarynyń kandıdaty, Almatydaǵy S.Muqanov pen Ǵ.Músirepovtiń ádebı-memorıaldyq mýzeı kesheniniń basshysy Ádilǵazy Qaıyrbekovtiń «Abaıǵa aparar jol» atty shyǵarmashylyq keshi ótti. Aqyn óziniń synyptas dostarynyń aldynda shyǵarmashylyq esebin berdi. Á.Qaıyrbekovtiń ómirbaıandyq órnekterine qurylǵan О́skemendegi oblystyq Jasóspirimder men balalar kitaphanasy ázirlegen «Kesteli sózdiń sheberi» atty ádebı-raft kórsetildi. Keshte sóz alǵan Abaı mýzeıiniń dırektory, Qazaqstan Respýblıkasynyń eńbek sińirgen qaıratkeri Turdyqul Shańbaı shyǵarmashylyq ıesi týraly jyly lebizin bildirip, Semeıdegi Abaı mýzeıi men Almatydaǵy S.Muqanov pen Ǵ.Músirepovtiń ádebı-memorıaldyq mýzeı kesheni arasyndaǵy dástúrli shyǵarmashylyq baılanystarǵa toqtaldy. Sharada «Abaıdyń óleńi», «Súıemin seni, Semeıim» (ekeýiniń de sózi Á.Qaıyrbekovtiki, áni Kentaý Nazarbektiki) syndy ánder oryndalyp, aqyn jerlesteriniń aldynda óziniń ár jyldar belesinde jazylǵan óleńderi men balalyq shaq balladalaryn oqyp, tyńdarmandaryn tánti etti. Á.Qaıyrbekov Abaı mýzeıiniń kitaphana qoryna óziniń on tomdyq shyǵarmalar jınaǵy men «Jandaýa», «Nazqońyr», «Bórtostaǵan», «Músirepovtyń hathanasy» kitaptaryn tabystady.
Ádebı-sazdy keshke aqynnyń synyptastary, Semeı qalasynyń zııaly qaýym ókilderi men jyrǵa jany qushtar jas jetkinshekter qatysty. Erteńine armandastar-synyptastar Jıdebaıǵa baryp, Abaı men Shákárimniń topyraǵyna táý etip, aq kúmbez kesenelerin kórip, rýhtaryna taǵzym jasap qaıtty.
Nazgúl ALTAEVA
