Kúzde Reseıdiń «MIFI» Ulttyq ıadrolyq zertteý ýnıversıtetiniń fılıaly Almaty qalasynda, I.M. Gýbkın atyndaǵy Reseı memlekettik munaı jáne gaz ýnıversıtetiniń fılıaly Atyraý qalasynda ashylady.
Bıyl qazan aıynda atalǵan joǵary oqý oryndary fılıaldarynyń bazasynda «Qorǵalǵan joǵary ónimdi esepteý júıeleri», «Elementar bólshekter fızıkasy jáne ǵarysh fızıkasy», «Munaı men gazdy izdeý jáne barlaý», «Munaı jáne gaz ken oryndaryn ıgerý, paıdalaný jáne keshendi mehanıkalandyrý men avtomattandyrý», «Munaı jáne gaz tasymaldaý» sııaqty mamandyqtar boıynsha kadrlardy daıyndaý bastalady. Oǵan 200 grant bólindi. Oqý prosesine jetekshi reseılik professorlar tartylmaq.
«Kásibı kadrlardy daıarlaý men ǵylymı zertteýlerdi uıymdastyrýda joǵary oqý oryndaryn álem elderiniń tájirıbesimen ushtastyrý jáne yntymaqtastyq aýqymyn keńeıtý zamanaýı bilim berý tehnologııalaryn keńinen engizýge múmkindik beredi. Tehnıkalyq kadrlardy daıyndaý jaǵynan reseılik ǵylym álemdegi eń úzdikterdiń biri sanalady. Sondyqtan bul tájirıbe bizge óte paıdaly», dedi Ǵylym jáne joǵary bilim mınıstri Saıasat Nurbek.
