Halyqaralyq antııadrolyq qozǵalystyń belsendi múshesi K.Kúıikovti el-jurt aýzymen, aıaǵymen sýret salatyn talantty sýretshi, ATOM jobasynyń qurmetti elshisi retinde tanıdy. Onyń eńbegin tek qazaqstandyqtar ǵana emes, álem halqy joǵary baǵalaıdy. Mine, osyndaı azamat álgindeı joǵary deńgeıli kórmege qatysýǵa tıis.
Bıylǵy qyrkúıekte Fransııanyń Renn jáne Parıj qalalarynda Káripbek Kúıikov ıadrolyq qarýǵa qarsy taqyryptaǵy shyǵarmalaryn usynbaq. Ol endi jolkirege qarjy jınaýǵa kómekteskenderdiń arqasynda ol jaqqa bara alady. Buǵan deıin K.Kúıikov jerlesterine úndeý tastap, esep-shot ashqan bolatyn. K.Kúıikovtiń úndeýi bir-eki kúnde áleýmettik jelide keńinen tarap, qaıyrymdy jandar sýretshiniń Fransııaǵa barýy úshin qarajat jınaı bastady. Bir aptaǵa jeter-jetpes ýaqyt ishinde olar qajetti soma – 6,5 myń eýrony (3,1 mln teńge) jınap úlgerdi.
«Bul azamattyq bastama osy kóktemde týǵan. Árıne, jobany memlekettik qarjylandyrý týraly sóz bolǵan joq. Fransııa tarapy kórmelerdi uıymdastyryp otyrǵanymen, biraq olarda meniń saparym úshin qarajat qaralmaǵan. Sondyqtan biz osylaısha qaıyrymdylyq aksııasyn bastaýdy jón kórdik», deıdi sýretshi.
K.Kúıikov saparǵa shyǵý úshin qarajat jınaýǵa kómektesken qazaqstandyqtarǵa alǵysyn bildirdi. «Belsendilik tanytyp, qoldaý kósetken qazaqstandyqtardyń meıirimdiligi meni shyn júrekten tańǵaldyrdy. Jerlesterim joba ıdeıasyn sonshalyqty tez ári joǵary deńgeıde qoldaıdy dep kútpegen edim. Atsalysqandardyń barlyǵyna alǵysymdy bildiremin. Bul – maǵan jeke qoldaý kórsetý ǵana emes, meniń eńbegimdi, men úshin ómirimniń mániniń, qanshama jyl boıy ıadrolyq synaqtardan zardap shekken týǵan jerimdi qorǵaý jolyndaǵy kúresimniń baǵalanýy, sondaı-aq bul – bárimiz sııaqty beıbit aspan astynda ómir súrý múmkindigine ıe bolamyz dep úmittenetin bolashaq urpaqty qorǵaýdaǵy qadam», deıdi Káripbek Kúıikov.
Qazaqstannyń Fransııadaǵy Bas konsýldyǵy da Strasbýrgte qazaqstandyq sýretshiniń kórmesin ótkizýdi usynýda. Osylaısha, Káripbek Kúıikovtiń týyndylary úsh qalada: Renn, Parıj jáne Strasbýrgte kórsetiledi.
Káripbek Kúıikovtiń antııadrolyq taqyryptaǵy kartınalary Japonııada, AQSh-ta, Shveısarııada kórmege qoıylǵan. Al Fransııada kórsetilmegen eken. Káripbek jańa týyndy jasap, Renn qalasyna tartýdy josparlap otyr.
