Talantymen top jarǵan Aıbek Qasymhanov – alty jasynan bastap dombyra tartýdy úırenip, sodan bergi aralyqta talaı márte óner saıystaryna túsken óren.
– Men Qaraǵandydaǵy mamandandyrylǵan mýzyka mektep-ınternatynda dombyramen án aıtý synybynda oqımyn. Meniń jetekshim – Azamat Túsipbekov. Kóptegen oblystyq, respýblıkalyq jáne halyqaralyq baıqaý men festıvalǵa, sondaı-aq «Qazaqstan daýysy» jobasyna qatysyp, júldeli oryndarǵa ıe boldym, – deıdi Aıbek Qasymhanov.
Grýzııadaǵy halyqaralyq baıqaýǵa jas ónerpaz Túrkııadaǵy jeńisinen keıin joldama alǵan.
– О́tken jyly men Almatyda ótken halyqaralyq baıqaýǵa qatysyp, birinshi oryn aldym, sodan maǵan Túrkııada uıymdastyrylǵan óner saıysyna joldama berildi. Men onda da birinshi bolyp, Grýzııada ótetin halyqaralyq mýzykalyq baıqaýǵa qatysýǵa shaqyrtý aldym. Shilde aıynyń sońynda ol jerge baryp, sáttilik serigim bolyp, Gran-prı jeńip aldym. Kelesi jyly taǵy da Grýzııadaǵy mýzykalyq jarysqa qatysýdy josparlap otyrmyn, óıtkeni men sertıfıkat enshiledim. Bolashaqta óz ómirimdi mýzykamen baılanystyrǵym keledi. Dombyra men dástúrli halyq ánderin dáripteımin. Mektepti bitirgennen keıin Almatydaǵy Qazaq ulttyq óner akademııasyna oqýǵa túsý josparymda bar, – deıdi jas dombyrashy.
Aıbek Qasymhanov negizinen halyq ánderin oryndaıdy. Túrkııa men Grýzııadaǵy baıqaýlarda ol «Bastaý» men «Háláýlim» týyndylaryn shyrqady. Aıbek Qasymhanovtyń esimi «Qazaqstannyń altyn balalary» kitabyna endi.
