Avtordyń aıtýynsha, ol kishkentaı qyzymen Shropshırge barǵannan keıin osy kitapty jazý týraly shabyt alady. Qyzy keń dalada emin-erkin jaıylyp júrgen jylqylarǵa qyzyǵyp, sheshesinen olardyń shyǵý tegin suraıdy. Jazýshy retinde qyzynyń bul suraqtaryna jaýap bergisi kelgen ol úıine qaıtqan soń, Botaı mádenıetin zertteýge kirisedi. Zertteý nátıjesi oǵan jylqyny eń alǵash qolǵa úıretkender qazaq halqy ekenin, sonymen birge, qyl quıryqtylardyń tarıhı otany Qazaqstan bolǵanyn dáleldep beredi.
Lýıza Pýl bul týraly:
– Bul oqıǵa meni qatty qyzyqtyrdy ári beıjaı qaldyrmady, sol úshin zertteýimdi toqtatpaı, ári qaraı jalǵastyra berdim, aqyrynda men Qazaqstan týraly qolǵa úıretilgen jylqylar jóninde, olardyń qaıdan shyqqanyn, qalaı ózgeriske ushyraǵanyn bile bastadym. Men Qazaqstannyń tabıǵatyna, halqyna oı júgirtýden tanbadym, – degen kózqarasyn aıtady.
«Jaryq juldyzdyń» keıipkerleri 12 jasar Raýshan men Jaryq juldyz atty ponı. Jazýshy shynaıy da adal dostyq hıkaıasy baıandalǵan bul shyǵarma jasóspirimderge, anyǵyn aıtqanda, jeti men on bir jas aralyǵyndaǵy balalardy qyzyqtyrady degen oıyn alǵa tartady.
Sonymen qatar bul kitap eresekterdi de qyzyqtyra alatynyna senimdi. Kitap avtory Lýızanyń mamandyǵy sýretshi, sondyqtan kitaptyń barlyq ıllıýstrasııalaryn ózi jasapty.
– Men bul kitaptyń jaryqqa shyǵýyna kómektestim, sonymen qatar onyń týyndysynyń kórkem úlgide oqyrmandardyń qolyna jetýine, shyǵarmashylyq belsendiligine qoldaý kórsettim, – deıdi kásipker Stıv Pýl.
Al jylqynyń shyǵý tórkini týraly balalarǵa arnalǵan kitap jazǵan jazýshy:
– Men Qazaqstanǵa baryp kórgen joqpyn, biraq bolashaqta barsam deımin, ol jaqtaǵy mádenı, tarıhı oryndardy, adamdardyń tirshiligin, alma baýlaryn jáne ejelgi adamdardyń tastarǵa salǵan sýretterin kórsem deımin, – degen josparymen bólisti.
Qazirshe atalǵan kitap tek qatty muqaba túrinde basylyp shyqqan. Biraq jaqynda jazýshy osy týyndynyń elektrondy nusqasynyń da oqyrmandarmen bólispek. Al keıipkerler Raýshan men Jarqyn juldyzdyń shytyrman oqıǵalaryn da avtor kitapqa kiristirýdi josparlap júrgenin jasyrmaıdy.
