Kórmege qatysqan avtorlar arasynda Rýdnyı qalasynan kelgen ismer Roza Nurmahanova da bar.
– Qazaqstanǵa qonys aýdarǵanyma bir aıdan endi ǵana asty. Qolymda «qandas» degen qujatym bar. Azamattyq alysymen О́zbekstanda bastaǵan isimdi qaıta jalǵastyrǵym keledi. Negizinen qyz-kelinshekterge arnalǵan kıim-keshek, odan bólek, qyz jasaýyn, er azamattardyń shapanyn tigemin. Sahnalyq kıimderge de tapsyrys túsip turady. Aldaǵy ýaqytta jeke sheberhanamdy ashsam degen oıdamyn. О́ıtkeni qazirdiń ózinde tapsyrys berip jatqandar kóbeıip ketti. Qasyma kelinimdi kómekshi etip almaqpyn, – deıdi Roza.
Festıval aıasynda «Ult asyly» atty arýlar baıqaýy uıymdastyryldy. Kópshilik aldynda baq synaǵan sulýlar ónerli-bilimdi ekenimen qosa, ulttyq salt-dástúrge de jetik ekenderin kórsetip, otbasylyq qundylyqtardy dáripteı bildi.
– Ulttyq qundylyqtarymyzdy keńinen nasıhattaý úshin óńirde osyndaı is-sharalardy jıi ótkizý mańyzdy. Ásirese jastar úshin aýadaı qajet. Búgingi festıvalimizdiń Ahańnyń eskertkishi aldynda ótip jatqanynyń ózi úlken mánge ıe. Keıingi býyn tól tarıhy men salt-dástúrin bilip, rýhy myqty bolyp ósýi kerek, – deıdi «Uly dala urpaqtary Qostanaı» qoǵamdyq birlestiginiń jetekshisi Nurjan Ermaǵambetov.
Festıval barysynda qala jurtshylyǵy Qostanaı, Rýdnyı shaharlary men Qostanaı aýdanynan kelgen ónerpazdardyń konsertin tamashalady.
Qostanaı oblysy
