«Super Bol» – biregeı joba

«Super Bol» jas fýtbolshylar jobasyn Prezıdent janyndaǵy «Dara» daryndylardy qoldaý qory jáne Freedom Broker ınvestısııalyq kompanııasy qolǵa alǵan. Fýtbolǵa beıim órenderdi irikteý jobasy Semeı qalasynan bas­taý alyp, Pavlodar, Aqtóbe, Aqtaý, Taraz, Shymkent, Nur-Sultan, Almaty qalalarynda jalǵasyn tapty. Biregeı joba 16 men 25 jas aralyǵyndaǵy jas fýtbolshylar úshin óz sheberligin shyńdaýdyń taptyrmas alańyna aınalǵanyn aıta ketý kerek. Elimizdiń ár óńirinen iriktelip, júzden júırik shyqqan 50 óren bolashaqta kásibı komandalar sapynda oınaýǵa joldama alǵan edi.

Sońǵy bir aı boıy Tal­ǵar­da­ǵy ulttyq quramanyń bazasynda da­ıyn­dyq jasaǵan jastar ár apta saıyn azýly komandalarmen jol­dastyq kezdesýler ótkizip turdy. Deı turǵanmen, olar úshin bir kez­deri ózderi úlgi tutqan Qazaqstan qura­masynyń ókilderimen bir alańda dop tebý aıtýly oqıǵa boldy.

Qazaqstannyń ardagerler qurama­synda alańǵa Samat Smaqov, Davıd Lorııa, Nurbol Jumasqalıev, Andreı Karpovıch, aǵaıyndy Azovskııler, Farhadbek Irısmetov, Dmıtrıı Bıakov, Aleksandr Kýchma, Maksım Jalmaǵambetov, Qaırat Áshirbekov, Danııar Muqanov, Sergeı Boıchenko, Iýrıı Novıkov, Igor Soloshenko, Rýslan Baltıev, Edýard Sergıenko sekildi ýaqytynda jasyl alańda jasyndaı jarqyldaǵan kil myqtylar shyqty. Sondaı-aq joldastyq kezdesýge kezinde Ispanııanyń «Real Madrıd», Italııanyń «Inter» klý­bynda dop tepken Esteban Kam­bıasso arnaıy shaqyrylǵan. Fýtbol ardagerleri komandasyna bu­ryn­ǵy­daı Arno Paıpers jetekshilik etse, «Super Bol» realıtı-shoýynyń qatysý­shylaryna aıtýly fýtbol mamany Talǵat Baısýfınov bapkerlik jasady.

90 mınýt boıy tartyspen ótken ardagerler men jastar básekesi kó­rer­menge erekshe áser syılady. Jan­kúıerler áldeqashan jasyl alańmen qosh aıtysqan súıikti oıynshy­laryn qaıta kórgende qıqýlap sala berdi. Trıbýnadan olardyń esimderi atalǵan saıyn ystyq yqylaspen demep otyrdy. «Super Bol» komandasy «á» degennen-aq oıyndy jigermen bastady. Ardagerler komandasynyń qaqpasyn qaıta-qaıta nysanaǵa alǵan jas jigitter aǵa býyndy biraz sas­tyrdy. Oıynnyń 10-mınýtynda jastar ókili Tımýr Tólegenov esep ashsa, araǵa birer mınýt salyp Emın Musaev esepti eseleı tústi. Osy qarqyndy jalǵastyrǵan Dýnaıbek Aıanhan men Álibek Járdemov alǵashqy taımnyń sońyna deıin qarsylastary qaqpasyna taǵy da eki gol saldy. Osylaısha, birinshi taım «Super Bol» komandasynyń paıdasyna 4:0 esebimen aıaqtaldy.

Ekinshi taımda ardager sportshylar shıryǵý kerek ekenin túsindi. Sát saıyn oıynshy almastyrǵan aǵa býyn alǵa umtylyp, jastarǵa qarsy jiger tanytýǵa tyrysyp baqty. Ekinshi kezeńde ulttyq qurama sheberleri Nurbol Jumasqalıev, Baýyrjan Islamhan, Murat Tileshov, Qaırat Áshirbekov tórt golmen jaýap qaıtaryp, tarazy basyn teńestirdi. Osylaısha, oıyn 4:4 esebimen teń aıaqtaldy. Matchtan keıin fýtbol jankúıerleri aıaqdop sheberlerimen estelik sýretke túsip, súıikti oıynshylarynan avtograf aldy.

Aıta ketý kerek, Qazsport arnasy arqyly kórermenge tikeleı efırde jol tartqan doda qaıyrymdylyq maqsatqa negizdelgen. Bıletter saty­lymynan túsken qarjy qaıyrym­dylyq qoryna aýdarylyp, ıgi maq­satta jumsalmaq.

ALMATY