Senat depýtattary – halyq ortasynda

Senattyń Ekonomıkalyq saıasat, ınno­vasııalyq damý jáne kásipkerlik komıtetiniń tóraǵasy Dáýren Ádilbekov jumys sapary barysynda Aqmola obly­synyń Jarqaıyń aýdanynda boldy. Senator sapar barysynda aýdannyń aýyl sha­rýashylyǵy salasynyń ahýa­lymen, oblystyq mańyzy bar Dala­baı-Derjavınsk jolynyń jaı-kúıi­men jáne Pıatıgorsk aýylynyń egin jınaý naýqanyna daıyndyq barysymen tanysty. Parlament múshesi Derjavınsk qalasynyń sýmen jab­dyqtaý júıesin qaıta qurý nysandaryn da  aralady. Jumys sapary aıasynda Dáýren Ádilbekov Aqmola oblysynyń Esil aýdanynda da bolyp, Dvýrechnoe aýylyndaǵy servıstik ákimdik ǵımaratyn jóndeý barysynan habardar boldy. Senator bul joba memlekettik qyzmetterdiń ashyqtyǵy men qoljetimdiligin tıisti deńgeıde qamtamasyz etýge múmkindik beretinin atap ótti. Ol sondaı-aq Kýrskoe aýy­lynyń ishki joldaryn jańǵyrtý barysymen tanysty. Depýtat Jaqsy aýdanynda bolyp, birqatar áleýmettik nysandy aralady. Atqarylǵan jumystar men josparlardy nazarǵa aldy.

Dáýren Ádilbekovtiń sapary Aqmola oblysynyń Qorǵaljyn aýdanynda jal­ǵasty. Depýtat Sabyndy jáne Kenbı­daıyq aýyldaryndaǵy birqatar áleý­mettik nysanynyń jumysymen, sondaı-aq «Nura toptyq sý qubyry» ShJQ RMK jóndeý jumysynyń barysy­men tanysty. Senator sý qubyry Qorǵal­jyn jáne Egindikól aýdandarynyń tur­ǵyndaryn aýyz sýmen úzdiksiz qam­tamasyz etýge arnalǵanyn eskere otyryp, obektidegi jumystardy sapaly jáne ýaqtyly aıaqtaýdyń mańyzdy ekenin atap ótti. Parlament múshesi óńirdegi sharýa­larmen de kezdesti. Jylyjaı qyzmet­kerlerimen kezdesý barysynda Qazaq­stan Respýblıkasy Parlamenti Sena­tynyń ótken sessııadaǵy jumysynyń qory­tyndylary týraly aıtyp berdi jáne aýyl turǵyndaryn tolǵandyryp otyrǵan ózekti máselelerdi talqylady. Senator Sabyndy aýylynyń aýyldyq dárigerlik ambýlatorııasy men mádenıet úıiniń qyzmetkerlerimen kezdesý barysynda Memleket basshysynyń tapsyrmasyna sáıkes ázirlengen halyqtyń tabysyn arttyrý baǵdarlamasy týraly egjeı-tegjeıli aıtyp berdi.

Senattyń Qarjy jáne bıýdjet ko­mıetiniń hatshysy Sultanbek Máke­janov Almaty qalasyna jumys sapary aıasyn­da Buqtyrma kóshesi men Qulja tas joly, Saıyn – Aqyn Sara, Seıfýllın – Jan­súgirov kóshe­leriniń qıylysyndaǵy kólikke ar­nalǵan jolaıryqtar quryly­synyń alańdarynda boldy. Senator qurylys-montaj jumystarynyń bary­symen tanysyp, qalanyń kólik ınfra­qurylymyn damytýdyń kele­shegin talqy­lady. Sultanbek Máke­janov Medeý aýdanynyń Alataý shaǵyn aýdanyndaǵy №7 jalpy bilim beretin mektep pen qalalyq aýrýhanada da boldy. Depýtat jańa oqý jylyna daıyndyqpen tanysty jáne medısınalyq mekeme ujymymen kezdesti. Parlament múshesi kezdesý ba­rysynda Palata qyzmetiniń qory­tyndylary týraly aıtyp, ótken sessııada qabyldanǵan zańdardyń negizgi erejelerin egjeı-tegjeıli túsindirdi.

Depýtat Murat Baqtııaruly Qyzyl­orda oblysynyń Shıeli aýdanyn­da boldy. Senator sapar barysynda Shıeli kenti, Báıterek jáne Jańaturmys aýyldyq okrýgteriniń turǵyndarymen kezdesti. Kezdesýge qatysýshylar jergilikti halyq­tyń áleýmettik máselelerin talqylady. Sondaı-aq kópir qurylysynda, mektepterde, sporttyq-saýyqtyrý kesheninde bolyp, №148 mekteptiń bý qazandyǵynyń qysqa daıyndyǵyn kórdi. Parlament múshesi Talaptan aýyldyq okrýgindegi sport mektebine de baryp, jóndeý jumys­tarynyń barysymen tanysty. Eldi mekenderdiń turǵyndary óz kezeginde usynys­taryn aıtyp, aýdandaǵy ózekti máselelerdiń tez arada sheshilýine úmit artatynyn aıtty.

Senator Aıgúl Qapbarova Shym­kentte qalalyq máslıhat depýtattarymen, sala­­lyq basqarmalardyń basshylarymen kezdesip, balalarǵa arnalǵan sport sek­sııalaryn qarjylandyrý máse­lelerin talqylady jáne Art sport baǵdar­lamasyna qatysýshylardyń suraq­tary men usy­nystaryn tyńdady. Depýtat óz sózinde Shymkentte 250 myńǵa jýyq oqýshy bar ekenin, son­dyqtan balalarǵa sportpen jáne shyǵarmashylyqpen aınalysýǵa qo­symsha múmkindik beretin Art Sport jobasy qalaǵa óte qajet ekenin atap ótti. Depýtat kezdesýdi qorytyn­dylaı kelip, óskeleń urpaq arasynda salamatty ómir saltyn qalyptastyrý, onyń ishinde Art Sport sııaqty baǵdarlamalar arqyly júzege asyrý mańyzdy ekenin atap ótti.

Senattyń Agrarlyq máseleler, tabı­ǵatty paıdalaný jáne aýyldyq aýmaq­tardy damytý komıtetiniń depýtat­tary Dúısenǵazy Mýsın, Muhtar Juma­ǵazıev, Ábdáli Nuralıev jáne Sultan Dúısembınov Shyǵys Qazaqstan oblysyna jumys sapary barysynda Katon­qaraǵaı memlekettik ulttyq tabıǵı par­kiniń aýmaǵynda boldy. Senatorlar park­tiń basshylyǵymen jáne mamandarymen kezdesý barysynda qoryqtyń materıaldyq-tehnıkalyq jáne kadrlyq áleýetin arttyrý, sondaı-aq shekara mańyndaǵy aýmaqtardy damytý, maral jáne omarta sharýashylyǵyn jetildirý, aýyl týrızmi máselelerin talqylady. Komıtet músheleri ósimdikter men janýarlar dúnıesin qorǵaý, olardyń sanyn retteý, ekotýrıstik brendıng jasaý, kelýshilerge qyzmet kórsetý sapasyn arttyrý tetikterin qaraý jóninde keshendi sharalar qabyldaý qajettigin atap ótti. Senatorlar sonymen qatar tarıhı-mádenı jáne arheologııalyq eksponattar saqtalǵan О́rel, Aqsý, Shyńǵystaı, Berel aýmaqtaryna bardy.